Kiwa kitkaam chnong kiwa em ha Block-I, ryngkat u MDC na Borato, u Aiborlang Shadap da dawa ki na ka sorkar wa la man katwa man emkaam wow phah u pynuiñ biang ya ka Block-I cha ka jylla Meghalaya ha i pynbait pood ka wat wa ar katni.
U Aiborlang da ong u wa i dawa wow phah pynuiñ biang ya ka Block-I cha kani ka jylla toh hajrong ka yurim wa ki bru kiwa chong chnong ha kani ka thaw toh du ki Pnar, wei da ong chooh chooh u wa ha kani ka thaaiñ da em hadooh 36 tylli ki chnong wa chong chnong du da ki Pnar wei kini ki chnong em ki hapoh ka Elaka Labang Nangphyllut Pangam Raliang.
Da ong u leh wa kiwa chong chnong ha kini ki thaw ha ki 70 snem wa da lai da im chitom ki wei hapyrdi i chah pynchitom.
Chooh chooh da ong u leh wa i kynaad wa da mih ha ki kajiak tayaaw wa dadep ha Khanduli da ktah ko leh yaka thaaiñ Block-I heiwa da thut i lai i wan yong ki.
Ha i yachem wa u Montri Rangbah ka jylla da em leh ka Hynniewtrep Border Dispute Redresal Forum wa da mihkhmat da u Chandame Sungoh kam u Chairman, wei neiliang ka Labang Nongphyllut, Pangam, Raliang Area Committee da yahkhmat da u Chairman, u Comingson Dkhar.
