Ka KAM Meghalaya waka TUR da beiñ joor ki yei leh palatpood wei pyrchah aiñ da ki pulit Assam kiwa da siat yap khlem da pyntip chwa hadooh wa da dooh yei mynsien wa lui-lui kiwa chong chnong ka chnong Mukroh kawa em ha khappood waka Assam ha ki thaiñ West Jaiñtia Hills.
Da ong wa nyngkong dooh kiwa chong chnong Mukroh da chah kem ki katwa ki dang lum dang lang ki ya ki mar khloo kawa man ka hok ka kynti yong ki wa da yoh pateiñ la pateiñ.
Wei yeini i hok da em ki da ki spah snem nachwa chwa wow em ki moo pood hapyrdi ki ri næ ki jylla. Ka khyndaw wa ki khloo toh ki yong kiwa chong chnong ym toh yong ka ri India næ jylla Assam. Tangwa da ki boon phaw tylli ki snem ki pulit ka Assam da leh embor ki wow pyndik ya ki bru ha ki chnong khappood.
Hadooh katni waroh ar ki sorkar yong ka Assam wa Meghalaya ym pu ye ki wow pynbait ya ki kaam kajia khappood. Tangwa lada ya pynbait ya u pood u ang leh, ka sorkar Assam lane sorkar India namo kiwon kiwon ki bor ym ye wei ym em hok ki wow knieh yei hok wa riti yong kiwa chong chnong wow pynlum pynlang yei baam wa ki mar wa mih ha khloo.
Man ko leh ka hok ki tre ki muluk wow baam yeiwa mih wa em ha khloo wa ka aiñ Forest Rights Act kawa e yeini i hok.
Ka KAM waka TUR da dawa ki wow kem syndon ya kitu kiwa siat ya ki bru wei wow su yaka lutsan bai sumaar kiwa mynsoo.
Ya ki hok yong kiwa chong chnong hajrong i mar khloo wa ki hok tynre yong ki ryngkat wa ki khloo ki kjam toh u pynskem da ki aiñ.
I pynbait pood hapyrdi ka Assam wa Meghalaya toh u pynbait hajrong ka yurim ka hok tynre yong kiwa chong chnong hajrong ki khloo wa iwa mih wa em ha khloo toh u pynneh wei yada ya ki.
Ka sorkar Assam wa Meghalaya ym toh dei wow pynslem ya ki kaam pynbait pood.
