U Montri ka chnat Social Welfare ka sorkar jylla, u Kyrmen Shylla da pynsñiaw u yei sñiaw diaw wa i chongkha khynnah dang em thaw ko ha kani ka jylla wot hadooh ha ki por wa katni leh. Heiwa da pynsñiaw u wa ka chnat ym ye ko wow yarap ya kitu kiwa chongkha khynnah neibhah wa tyngkheiñ ki ya ka aiñ.
Da ong u wa neiliang ka sorkar na i por cha i por jooh pynche wei pynsñiawthooh ko wa kiwa chong chnong ym toh wow jhan ki wow chimkti jhan ya katai ka lyngkor katwa ym pu kot i rta wa biang.
U Montri uwa man leh ya idæ uwa dang chong khynroo, da ong u wa kitu ki wym jhan wow chimkti ya katai ka lyngkor, yoh kyrhai ki yei por wow lehkmen yei im man khynroo yong ki, deiwa pynrap wa da yoo u wa kitu kiwa yoh khon khlem pu biang rta, ym em por ki wot ya idæ neibhah wa hap ki wow pait ya ki khon najrong ki emkaam wa boon.
Kamwa man ha kiwa boon hi, kiwa dang hapoh 18 snem lada dang toh kiwa lai puræ, boon toh kiwa dang sdang wow psiah lai puræ ha ki College wei lada kreh ki leh, boon toh ha ki kaam samen neibhah kiwa 18 snem wot ha ki kaam sorkar leh ym pu pdiang.
Kamtæ hajrong katai ka phang leh, u Montri da ong u wa i chongkha khynnah ye ko leh wow ktah wot ya ka yung ka sem khamtam lada jia wa kitu ki chi kurim ym pu em ki ya ka kamai kajih.
Najrong ini, u Montri da pyntip u leh wa em leh ki kyndon aiñ kiwa da maham yei chongkha khynnah.
Hawa wubab won hajrong i kylli, la kitu kiwa yoh khon dei wym pu biang rta lada ye ki næ ym ye wow dawa bai baam na u kurim lada jia wa iehnoh u, i jubab wa u Montri e u toh wa ym ye ki wow dawa bai baam neibhah wa ki hi nyngkong da tyngkheiñ ki ya ki kyndon wa da booh.
Chooh chooh da ong wa wot kitu kiwa da biang i rta lada ym pu em ki ya ki kot ki sla kiwa pynyoo wa ki da tipmit kam ki chi kurim, ini daw eh bha ko ya ki wow dawa bai baam lada jia wa yut noh u kurim.
Deiwa pdaing wa i chongkha khynnah dang joor i ha ka jylla, u Montri da pyntip u leh wa em won ki manyung kiwa yada wei pyn-eh wa katai ym toh iwa monlang næ da iwa pynbait lang.
Ha i jooh i por u Kyrmen da kyntu u ya ki khynroo khyllod ka jylla wa toh u pynemkaam hok yei por wa man khynroo, kamai chwa wei pyndap pynbiang ya idæ hachwa wow chimkti ya ka lyngkor manbei manpa khnang wa manda yoh ya ki khon ki kti leh ye ki wow kyrchaan wei pyndap pynbiang ya ki katkam i emkaam wa i dawa yong i por.
