U montri rangbah ka jylla u Conrad Sangma ynne da pyntip u wa kamwa da chah wow wanrah ya kitu kiwa sahkut cha kiwi ki jylla, kamtæ ya ini hapoh Meghalaya da yabhah haki ar bynta (Two Phase).
Yaka bynta wa nyngkong toh wow wanrah ya kitu kiwa em cha ki jylla ka thaaiñ Northeast katwa ka bynta wa ar won toh ya kitu kiwa em cha kiwi ki jylla hapoh ka ri.
Na kini da em kiwa da jied wow liwan daka yong ki hi ka kari wei neiliang ka sorkar leh da pynbiang kari ko ya kitu kiwa ym em kari.
U Conrad da pyntip u wa da em palat 3000 ngut kiwa na Meghalaya kiwa em cha ki jylla ka thaaiñ Northeast wei kiwa boon toh em ki ha Assam. Wei manda uiñ ki daw chimkhia wow pyntikna wow bood ki yaki kyndon wow thap pyrtuid (Register) khem pep, wei yeini ye u leh Online, deiwa phone wei ya kiwa ym em phone daw hap Register ki ha i thaw wow psiah chapoh ka jylla wa em 4 tylli.
Ha kini ki thaw psiah daw em ki pulit, ki magistrate, ki doctor ki wow pyntikna wa da bood thij pa thij yaki kyndon kam ka Medical Screening wei lada chem wa em kiwon kiwon kiwa em i dak i chin wa chitom daw rah yaki cha ki Corona Care Center lane cha ki Isolation Center tangwa lada man ki kiwa chait daw hap ki wow chong kset ha yung.
Chooh chooh da ong u wa ym ye u phah ya waroh kiwa ym em yaki dak ki chin cha ki thaw leh Quarantine neidaw wa boon ki wei manda liwan sa kiwa em cha kiwi ki jylla kiwa ye u poi hadooh 30,000 ngut man ko kawa eh wow chem thaw booh yaki, kamtæ da phah leh yaka Home Quarantine kawa da leh da bood leh cha kiwi ki thaw wa ki ri.
Da pynche chooh chooh u wa waroh kiwa em ha yung kiwa liwan hap ki wow leh yaka Home Quarantine wa 14 sngi khlem mih cha lait wei ka sorkar daw yarap ko yaki da ki marbaam wa kiwi iwa emkaam ki heipor wa leh Quarantine.
Da kyntu u leh yaka imlang sahlang wow kyrchaan wei ym toh u kyntait ya kini kiwa liwan kamjooh leh yaki waheh chnong wow pyntikna ki wa kini kiwa leh Quarantine ym em tyngkheiñ ki yaki kyndon.
Discussion about this post