Kiwa kamai kari ka Assam wa Meghalaya toh u ya pynbait ki deiwa myntoilang na ki kaam uiñke suwari

U Sanbor Shullai, MLA uwa man leh kam u Chairman ka Meghalaya Tourism Development Corporation da ong u wa i maham ka All Assam United Motor Transport Association yow khang ya ki kari wa kit ya ki mar wa emkaam u psiah ki cha Meghalaya toh u beiñ ki neibhah da man ko pyrchah yei yatoh lok iwa da ki spah snem wei daw pynkut ko leh yei sñiaw chi payu para hapyrdi ki jylla ka North East.

Da kyntu u leh ya u Montri Rangbah ka Assam, u Himanta Biswa Sharma wow chim u dei bor yong oo pyrchah ya kini ki bru kiwa da maham wow pynthut yei im ki bru paidbah.

Da e buit u leh wa hawa em i thut toh u chong yaklam da waroh ar tylli ki Association kamwa da ye u leh ha Sikkim wa ha Darjeeling, West Bengal, heiwa da ye wow ya sñiawthooh lang deiwa wanrah ki kyndon ya krehlang.

Da ong u leh wa ki daw wa da wanrah ka All Khasi Meghalaya Tourist Taxi Association toh kiwa biang wei toh u chong yaklam ya pynbait wa ki seiñ kamai Tourist Taxi kiwa na Assam. Waroh arliang toh u wan ki hei ya sñiawthooh lang yow myntoi kiwa em ha Meghalaya kamjooh kiwa uiñke suwari.

Related posts

Chah kem 8 ngut kiwa slaitbor ya ka khynnah wa dang 15 snem deiwa rahbor ka heipor wa lai mihlait

January 11, 2026

I yap u Garo toh neidaw wym ye ka sorkar wow pynsangeh yei tih mar pohkhyndaw pyrchah aiñ: BJP

January 11, 2026

Chooh chooh da ong u wa i kam kiwa em ha Meghalaya leh toh u leh i yei bynta yong i deiwa booh da ki dor wa biang, u pyndap yeiwa emkaam wei wow man kiwa tip u pdiang deiwa bha ya kiwa uiñke suwari kiwa na baar ka jylla yow sahkynmoo ki hawa wan ki cha i yow sdang ki leh wow chim da ki kari yong i.

“Ki seiñ kiwa kamai Tourist Taxi ha Meghalaya wa kiwi kiwa emkti toh u chong yaklam ki yow pynku ya ki kaam uiñke suwari”, da ong u Sanbor.

Da ong u leh wa ka sorkar Meghalaya hapoh i yahkhmat u Conrad Sangma da leh ko chiboon yow pynku ya ki kaam uiñke suwari wei i toh u tip i wow chim ya kani ka kabu yow pynku ya kani ka kaam. Chooh chooh da ong u wa ha Meghalaya kiwa uiñke suwari daw poi ki cha iwa boon dooh ha kini ki 10 snem wow wan du na ki laad ki luti wa da wai da ka sorkar MDA wei ye wow poi hadooh 50 lak ngut kiwa uiñke suwari ha chi snem wei ini daw man ko i myntoi ya waroh ar tylli ki jylla lada em i ya sñiawthooh hapyrdi kiwa kamai kari ka Assam wa Meghalaya lada ye ki u ya pynbait.