Shillong: Ka jylla Meghalaya ynne da em ko 4 ngut kiwa khlaad nei chah ktah ha u COVID-19, deiwa em i khlaad noh ki 2 ngut ynne i step ha North East Indira Gandhi Regional Institute of Health and Medical Sciences (NEIGRIHMS).
U Director of Health Services (MI), u Dr. Aman War da pyntip u wa ki ar ngut kiwa khlaad ha North East Indira Gandhi Regional Institute of Health and Medical Sciences (NEIGRIHMS) toh kiwa em chwa i chitom iwa da ban won najrong sa u COVID-19. Kini kiwa da khlaad toh kiwa tip pyrtuid kam u Banteilang R Syngai (40) na ka chnong Ladsharai, Ri-Bhoi District wa u Nandeshwar Deury (48) uwa man u chipai BSF.
Katkam wa pyntip u DHS, u Banteilang R Syngai (40) toh u wakreh ha Geological Survey of India ha Kolkata, uwa da liwan cha ka jylla yow phah sumaar neidaw wa em moo u ha u ksang, ha ka 5 tarik uni u bnai da yah ya oo cha NEIGRIHMS wei ha katai ka sngi da Test da ka RT-PCR wei da chem wa em u ya u COVID-19, wei neiliang ki bor pynlai ka Hospital ym em pynlait ki wow lai u cha yung wow leh Quarantine neidaw wa ood sooh u.
Da pyntip u leh wa da Test biang ya u Syngai ha ka 16 wa 17 tarik uni u bnai, wei ka Report da pynyoo ko wa ym em de u ya u COVID-19, tangwa ym pu em pynbna wa da chait u neidaw wa dang yang chooh chooh ki Report, ha ka 18 tarik da sdang u wow chitom joor heiwa da booh noh ya oo ha ICU neidaw wa chitom u wow riñ mynsien wei da khlaad noh u heipor chwa pyrdi synyaw.
Hawa yatoh wa u Nandeshwar Deury (48) uwa man u chipai BSF uwa da khlaad noh, u DHS da pyntip u wa da yoh u ya u COVID-19 na uwi uwa yoh chwa, ha ka 4 tarik da chem wa da yoh u ya uni u khñiang wei da sumaar nyngkong hapoh ka Composite Hospital ka BSF wa em ha Umpling, tangwa hadien da pynkit noh cha Civil Hospital, Shillong neidaw wa chitom u wow riñ mynsien wei em u leh yaka ka’oh, na Civil Hospital da pynkit noh cha NEIGRIHMS ha ka 13 tarik uni u bnai, tangwa da khlaad noh u haka 19 tarik heipor 2 waje i step wei uni toh uwa chitom chwa naka Type-II Diabetes.
U Dr. War da pyntip u wa yei met wa sah yong kini ki 2 ngut da pyndep ynne ka sngi, wei ya u Syngai da pynkit noh cha chnong yong oo wow pyndep yei tlep, katwa ya u Nandeshwar da thang noh ha Jhalupara, Shillong.
