U Montri Rangbah ka jylla, u Conrad K. Sangma ynne da ong u wa ka sorkar dang thooh ko ya ki laad wow e kyrchaan ya ka Mendipathar College, North Garo Hills kawa man ka thaw puræ kawa rim dooh ha North Garo Hills kawa da lehkmen leh yei dap snem wa 50 ha uni u snem namo ka Golden Jubilee.
Ya kani ka Golden Jubilee da wan sakhi leh da u Montri ka chnat puræ puthi, u Lahkmen Rymbui, u Deputy Speaker, u Timothy D Shira, ki MLA u Rupert Momin, u Pongseng Marak wa kiwi kiwi.
“Chwa u 2018 da kular O ya ki paidbah ka jylla wow kreh neibynta i stat i tip lada e laad ki heiwa katni da wanrah ya ka State Education Policy wei da kreh wow pynwandur ya i rukom esikai hapoh ka jylla”, da ong u Conrad deiwa pynrap wa ka sorkar da pynlut ko palat T. 2000 klur chi snem neibynta i puræ puthi tangwa kattæ leh ympu biang u dap i.
Chooh chooh da ong u wa ka bhah na ka mang tangka wa heh dooh lai ko cha i puræ puthi wei du ha uni u snem da pynlait T. 100 klur neibynta ki 200 tylli ki Government LP School neibhah boon na ki da sih bha ki wei wa ka sorkar da jied ko sa 300 tylli ki skur wow pynmiat ya ki wei da pynkhreh leh ya ka bhah poisa neibynta itæ.
Heiyatoh wa i boon ki khynnah kat dang mih ki snem da ong u wa ha ki san snem ki khynnah daw kynjoh ki cha ka 4 lak ngut tangwa em won du 45,000 tylli ki Seat ha ki College ya ki khynnah. Da ong u leh wa ka sorkar tip ko yei eh i khoo wei dang kreh ko wow pyntikna wa boon ki Seat wei u sdang ya ki College ha kylleiñ ka jylla khnang wow pyntikna wa ki khynnah ym dooh ki yei hok yong ki.
Da e nongmuna u ya ka “People’s College Scheme” heiwa da yarap ya ki 9 tylli ki College heiwa da sdang leh ya ki Community College wa ki Model College wei emkaam wow mih chooh ki College rap chaphrang deiwa ong leh wa toh u pynboon ya ki Science Stream ha ki skur Higher Secondary neidaw wa duna ware ki.
Ha kani ka sngi da pynlait paidbah leh ya ka Souvenir yong i lai luti wa 50 snem ka Mendipathar College.
U Lahkmen Rymbui hawa e yei klam da ong u wa ka sorkar da yaleh ko wow pynwandur ya i puræ puthi wei wow chimkhia ya i eh i khoo wa chem kiwa sikai wa ki khynnah.
Da pyntip u leh wa ka sorkar MDA da chim ko ya ka laad wow thung kreh (Regularize) ya kiwa sikai wei ha uni u snem da em 1300 ngut kiwa sikai wa da thung pura da ka sorkar.
Heiyatoh wa ka Scholarship ki khynnah da pyntip u wa da pynku ya ka cha ka T. 15,000 iwa chong ha i kyrdan (Grades & Categories) wa ka Merit Scholarship kawa da pynku na ka T. 60 cha ka T. 600 chi bnai.
U Lahkmen da ong u wa ka sorkar da yaleh ko wow pynmiat ya i rukom esikai liang wanang khnang wow myntoi ki khynnah.
