Ynnin i janmiet ki bru yong ka aiñ wa kynthup naka District Legal Services Authority, West Jaiñtia Hills District Jowai waka West Jaiñtia Hills Police da hiar pynsñiawthooh paidbah ki ha Yungwalieh ka Loompyrdi Ïongpiah hajrong ka phang “Cyber Crimes & I.T. Act, 2000” deiwa kyrchaan ka National Legal Services Authority (NALSA).
Ini i pynsñawthooh paidbah man ko kam chibynta ka National Cyber Security Awareness Month yow yarap ya ki bru u tip ki wow syndong ya idæ ha kani ka juk chah thok Online wa boon jait lyngba ka Internet.
Ha ka yalang wa pynlai da u Waheh Chnong ka Loompyrdi Ïongpiah, u A. Ñiangti, ka muktiar C. Dkhar da pynche ko ya ki kyndon wa ki bru ye ki u ngat deilang waka kuna lada emkti ki wow tooh næ pynsih yaki Data ki File yong kiwi wa booh ha ki Computer, la jia wa pynemkaam bakla ki yei pyrtuid kiwi deiwa tooh na ki Computer næ kiwon kiwon ki kor Electronic, neitæ i tooh wei pynemkaam bakla ya yong kiwi namo ka Personal Identity wa kiwi ki rukom.
Neitæ da batai bniah ko leh ya ki kyndon wa emkaam yong ka aiñ I.T. Act 2000 wa kynthup ya ka Section 78, 65, 66 wa kiwi.
Neiliang ka I. Kharpran, OC Women’s Jowai Police Station hawa klam hajrong ka “Cyber Crime” da e nongmuna ko ya ki Case wa boonjait wada jia haka District. Wei ong ko leh i daw hi wa poi i jia chah thombor cheiwa heh toh wa suki bait ki yei jia wa khian chadien.
Hawa khana ko ya kiwa leh ya ki kaam pyrchah aiñ, da pyntip ko wa ye ki u ngat ha ki kyndon hawa phah yei dur, ki Video kiwi khlem i ngait i tip yong ki tre, neitæ hawa leh Video Call i pynyoo yei bynta i doh i pran wa khlemakor, i pynbor ya kiwi wow leh iwon iwon i kaam, heijooh i por la toh wot chikhynroo leh i pynbor wa du na chiliang khlem ngait lang leh ye u ngat ha ki kyndon aiñ.
Kamtæ kyntu ko ya ki paidbah wow wan pyntip smat cha ki bor pulit nadooh wa sdang jia i chah thombor wa khian khnang yow lait nei heh, wei kyntu ko leh hawa pynemkaam ya ki laad ka stat Technology toh u man kiwa syndong yow lait nei chah thok i sihlet hadien.
Katwa u S. Mannar, OC Jowai Police Station ong u wa em boonjait ki Case wa jia haka District iwa da wanrah i dooh nong kamjooh i sarom ya kiwa ngat.
Kamtæ kyntu u wow yait ya ki Message ki E-mail wa wan lyngba ki Social Media deiwa Block lane Report, neibhah boon wa thok deiwa kular e kreh, deiwa tyrwa jem dor yaki tiar haki Social Media, kamjooh kyntu u hawa thied tiar Online toh u pait yaki Website wa tikna.
Heiyatoh waka I.T. Act ong u wa man iwa eh bha u yarap ya kiwa chah pynngat, wei i chah pynchitom deiwa ngat haka I.T. Act toh i chah kset 7 snem deilang ka kuna wa T. 5 lak hadooh T. 10 lak. Kamtæ kyntu u wym hoi u pynpoor namo wow Share ki Video khlemakor yong kiwi neibhah i jooh i kyndon chah pynchitom u ngat ki wa kiwa riñ yei Video.
Pyntip u leh ya ki paidbah hawa chem ki iwon iwon i chah thombor i eh khamtam ki kynthai toh u Phone ki ha u Number 112 yow smat yoh i yarap ha iwon iwon i por waroh 24 kynta neibhah da em ka kari wada booh ka sorkar.
Ha kani ka janmiet najrong kiwa chong chnong ka Loompyrdi Ïongpiah da emlang leh ki waheh chnong ka Dulong, Panaliar wa Chilliangraij.
