U Judge wa da chong-ngiah, u Justice (Retd) BP Katakey uwa khlieh ya ka Committee wa samen wa thung da ka High Court ka Meghalaya yow takit yei tih mooyong wei chalan mooyong pyrchah aiñ, da ong u wa kiwa da yoh ya ka License wow tih mooyong katkam ka ‘Scientific Mining’ daw hap ki wow bahkhlieh wow tlep lut ya ki krem mooyong kiwa em hapoh 1 Kilometre na ka thaw wa pynkrehkaam.
“Toh u em ki bor wow pait yeini i kaam. Ym em wa ye u kyntait wym em i tih mooyong pyrchah aiñ ha Meghalaya, tangwa kawi kawa da khana ya nga wa kiwa da yoh bor wow tih mooyong katkam ka ‘Scientific Mining’, da em ka kyndon (ka wym pu em yoh oo u), tangwa da pynkit ha kiwa da yoh bor wow tih mooyong wa toh u tlep lut ki ya ki thlu ki krem tih mooyong kiwa da em ha kylleiñ soodong wa em hapoh 1 kilometre na ka thaw tih mooyong”, da ong u Katakey hawa yaklam wa kiwa thoh khubor ynne ka sngi.
Kam wow pynyknmoo wa ha ka 17 tarik uni u bnai da wai ya kawi ka thaw tih mooyong ha Byndihati kawa man kawa nyngkong dooh wow tih da ka Scientific Mining wei ya ka License da yoh da u Dapmain Shylla.
Ha kawi won ka liang, u Katakey da khana u wa ka Committee u da paan pynche ko leh hajrong ka Report wow leh ya ka ‘Aerial Survey’ namo ka sorjamin wa na suiñ ya u mooyong wa em hapoh ka 1 Kilometre soodong yong ki thaw pynlang mooyong ha ki soo tylli ki District, wa kynthup ha East Jaiñtia Hills, West Khasi Hills, South West Khasi Hills wa South Garo Hills.
“Ka sorkar ha u snem 2019 da e ko ya ka ‘Affidavit’ hapoh Supreme Court wa pynyoo ya ki thaw wa pynlang mooyong wei hajrong kani i da phah i wow leh ya ka Survey yow pait ya u mooyong u wym pu em chim yukheiñ. I kwah i wow yoo wa lada hapoh ka 1 Kilometre soodong em næ ym e u mooing u wym pu em chim yukheiñ”, da ong u.
Da ong u wa ka Report wa Survey na suiñ ya u mooyong da toh wow e ha ka 19 tarik uni u bnai, tangwa hajrong ini daw yaklam biang da ka Committee neibhah wa kwah u sa kattu-katni i pynche, wei da ong u wa da phah wow e kitæ ki pynche wei da yooluti u wow yoh mynstep ka sngi.
Hajrong ka ujor wa da booh da soo ngut ki bru wa pyrchah yei tih mooyong pyrchah aiñ ha South Garo Hills, u Katakey da khana u wa da yoh ya ka Report takit hajrong ini kawa da e da ka Committee kawa da khlieh da u Naba Bhattacharjee.
“Dang em leh ki takit wa hap wow leh wa ka sorkar da phah ko ya u Deputy Commissioner ka South Garo Hills wow lai pynsakhiat da oo wei wow e ya ka Report hapoh chitayaaw”, da ong u Katakey, deiwa pynrap wa ka Committee da yooluti ko wow yoh ya ka Report hadien chitayaaw.
Discussion about this post