Ka National Road Safety Week 2024 hajrong ka phang “Be a Road Safety Hero” da pynman yaka ha Lad Rymbai da ka yung krehkaam u District Transport Officer, East Jaiñtia Hills District chirup wa ki bor District, ki pulit waka chnat i chait i khiah.
Ha kani ka sngi da em u District Transport Officer (DTO), u P. Laloo, u Motor Vehicle Inspector (MVI), u H. Dkhar, u Sub-Inspector (SI), u E. Sohshang, kiwa mihkhmat ka chnat i chait i khiah, u Dr. D. Sayoo, u President ka Local Taxi Association, East Jaiñtia Hills District, u T. Rymbai, u President ka Tourist Taxi Association (Lad Rymbai- Jowai), u S. Ryngkhlem wa kiwi kwi.
U MVI da khana u ya ki kyndon yah kari wow lait nei ya tyrrah kari deiwa ong leh wa kani ka yalang toh wow pynsñiawthooh paidbah kammon u chngaaiñ hawa lai wa wan deiwa pynrap wa kiwa yah kari em i yei kitkhlieh ym du neibynta yong ki tangwa kamjooh ya kiwi leh.
U E. Sohshang da ong u wa man iwa sñiawkhia nei ku i tyrrah kari man-u-snem nei yah khaler wa i wym bood ya ki kyndon wa da booh deiwa kyntu ya waroh wow kiar nei dih kiad hawa yah kari.
Da kyntu u leh ya ki paidbah wa lai kjat wow bood ya ki kyndon hawa lai wa wan khnang wow lait na i mynsoo wa i jia wa sñiawsih.
Kiwi wa da klam toh u Dr. D. Sayoo, u T. Rymbai wa u S. Ryngkhlem.
Discussion about this post