Kiwa yaleh CUET mynstep ym ye de u leh iyi iyi tangwa ya kiwa daw yaleh hadien daw pynbait deiwi: Rakkam

Ka National Testing Agency (NTA) da lai lait ko ya ka sorkar Meghalaya deiwa khlem da yasyllok iyi iyi heiyatoh wa ki thaw thoh Exam (Exam Centre) neibynta kiwa yaleh ya ka Central University Entrance Test (CUET), ka wow sdang nadooh ka 13 tarik uni u bnai.

Ini i wym kheiñ snep yong ka NTA ya ka sorkar jylla da mih ko hadien wa kiwa boon na kiwa yaleh ya kani ka Exam da ood ki nei chah pynngat thoh ya ka CUET cha baar ka jylla wa kynthup chadooh cha Andaman & Nicobar Island.

U Montri wa pait ya ka chnat puræ puthi ka jylla, u Rakkam A Sangma hawa klam ynne ka sngi, da ong u wa u Montri Rangbah ka jylla, u Conrad K Sangma da yaklam u wa u Montri ka sorkar pyrdi wa pait ya ka puræ puthi, u Dharmendra Pradhan hajrong i eh ki khynroo khyllood wa yaleh CUET.

“Kani ka yaklam da rap dær por ko kajiak neibhah ka Exam daw sdang noh ko mynstep ka sngi, i eh toh neidaw wa ka NTA ym em yasyllok ko ya ka sorkar jylla, heithaw wow yasyllok chwa ko, da leh ko chi sngi ar sngi chwa wow pynman ya ka Exam,” da ong u Rakkam.

Related posts

Da ka Bike Rally pynman ha Shillong yow pynyoo yei kyrchaan ya ki chipai ka ri

May 12, 2025

Mynjur ki heh chipai ka India wa Pakistan wym siat chi kuli leh

May 12, 2025

Da ong wa kattæ ka sorkar ym ye de ko wow leh iyi iyi neibhah da em kiwa yaleh Exam wa da mih na ka jylla yow lai cha ki thaw pynman Exam.

“Hanla kattæ leh, hadien wa wan yaklam u Montri Rangbah na Delhi, ka NTA da yaklam ko wa ka sorkar jylla neibynta u pynbait ya ki thaw pynman Exam, wei mynstep ka sngi daw wan pait ki ya ki thaw wei wow kyrriah noh ya ki thaw pynman Exam yong kitu ki khynnah ki wym pu yoh wow thoh mynstep næ ha ka sngi wow wan,” da ong u Rakkam.

Hawa kylli, u Rakkam da ban biang u wa i eh toh neidaw wa ka NTA ym em yasyllok ko næ pyntip ko ya ka sorkar jylla, wei na itæ i daw ka sorkar ym tip ko yei eh, wei yeini da pyntip da kiwa yaleh Exam.

“I da dep jied i ya ki thaw pynman Exam, tangwa hawa ym pu biang ki, ka NTA toh u pyntip ko cha ka sorkar wym pu biang ki, tangwa ym em leh ki kamtæ. Nga tikna O wa kiwa toh wow yaleh ya kani ka Exam wa kiwa toh u yakhun ha ka tayaaw wow wan daw chah kyrriah noh ki cha ka jylla yong i,” da ong u Montri.

Hawa ban joor biang wa toh i bakla yong ka NTA kawa da wanrah yeini i eh wa khroo, u Rakkam da ong u, “Ka NTA ym em yasyllok næ pyntip ko ya ka sorkar, ini toh i daw wa eh. Da toh u pyntip ko cha ka sorkar heipor wa biang khnang wa ki khynnah yong i ym maad ki yei eh.