I kylla ka suiñ bneiñ ya iwa tip leh kam ka Climate Change da ktah ko ya ki bru ha kylleiñ ka pyrthai wei ha kani ka kynti ka United Nations Human Rights Committee (UNHRC) ha ka sien wa nyngkong da ong ko wa ki bru wa yut chnong neidaw ini i kylla ye ki u yoh Asylum kam ki Climate Refugee.
Ka Asylum toh i myntoi wow sah chngaaiñ ha ka ri hadien wa da yut chnong ki na ka ri wa mantre ki na ki daw wa boonjait kam i pyrchah ya ka sorkar, i chah pynchitom, chah lehbeiñ, wa kiwi kiwi ki daw iwa pynbor ya ki bru wow yut ki khnang wow ye ki u im laitlooid kam kiwi tawon.
Kani ka Committee da e ko ya kani ka rai ko ynnin ka sngi hawa chong bichaar ko ya ka mukotduma yong uwi u bru uwa tip kam u Ioane Teitiota wa chah phah liwan (Deported) na New Zealand neibhah da ong u wa da yut chnong u neibhah wa da ngam i yung wa sah u.
U Ioane Teitiota toh uwa na ka ri Kiribati kawa em ha duriawbah Pacific Ocean.
Da kam u wa emhok u wow neh ha New Zealand neibhah ka ri yong ko da sdang chah tymmoh ko ha ka um duriaw kawa da sdang ku.
Chooh chooh da ong u wa ka manyung yong oo da im chitom ki neidaw wa sdang duna ka umdih wei da sdang i kajia wa i yaknieh thaw neidaw wa da sdang ku ka duriaw.
Ha u snem 2015 ka yung kasari ha Wellington da ong ko wa u Teitiota ym chah ktah u lada liwan u cha ka ri wa mantre u.
Ki kyndon wa kani ka Committee ka UN da pynchong yurim ko ya kani ka mukotduma toh katkam ka International Covenant on Civil and Political Rights yong u snem 1966 wei ha kani ka mukotduma ka Committee da ong ko wa ya u Teitiota ym ye wow phah liwan noh ya oo na New Zealand neibhah daw tyngkheiñ yei hok yong oo kam u bru wow im.
Chooh chooh kani ka Committee kawa kynthup ya ki 18 ngut ki bru chemphang (Expert) da ong ko leh wa neini ki bru ye ki u kam Asylum neidaw wa kylla i suiñ bneiñ.
Discussion about this post