I dawa wow pynpsiah ya ka ktien Khasi hapoh ka Eight Schedule yong ka riti synchaar da sahteiñ wot hadien wa ka yung dorbar chna aiñ ka jylla da mynjur ki ya ka rai (Resolution) nadooh u snem 2018 deilang wa i yakhun yong ka Khasi Author’s Society (KAS).
Hawa yaklam wa kawa yoh ya ka Padma Shri Award kawa man leh kawa thooh bniah ha ka ktien Khasi, ka Prof. Badaplin War da ong ko wa ki jai ktien wa da pynpsiah katni hapoh ka Eight Schedule ym toh kiwa tam ya ka ktien Khasi. Wei da ong ko wa ya ka ktien Khasi nadooh u snem 1919 da pynpynpsiah kam kawi na ki Subject hapoh ka Calcutta University wei hadien da pynpsiah leh ha Gauhati University wei katni ka ktien Khasi da em ko hadooh ka kyrdan Ph.D.
Chooh chooh da ong ko wa ini i stat thooh bniah yei thoh i taar lada pait du neini i liang leh ym em de ki kyndon wow khang ya ka ktien Khasi wym ye wow pyndap pynbiang yeiwa emkaam, wei lada pait neiliang yong i boon bru leh man ko kawa da biang, wei katni hap wow em i kyrmen wa ini daw jia i ha kawi ka sngi.
Ka Prof. Badaplin War da pyntip ko wa man-i-por da yachem wa ki heh sorkar, wei wot heipor wa wan u Montri Kaam Pohyung ka ri India, u Amit Shah da ong u wa daw pyrkhat bha hajrong ini i dawa pynpsiah ya i Ktien Khasi hapoh ka Eight Schedule.
Da ong ko wa i pynpsiah ya kawon kawon ka ktien hapoh ka Eight Schedule toh du ha ka yung dorbar Parliament, wei da pynsñiaw ko wa hadooh katni ym pu rah ya ka Bill hapoh Parliament, wei ya katni ym pu tip wa kani ka dawa daw mankaam namo ym man.
Ka Prof. War da ong chooh chooh ko wa heipor wa nachwa ym em ware ka yakhih yong kiwi ki jait ktien wow yoh yei tipmit, tangwa katni da boon ki jylla kiwa yaleh wow yoh yei tipmit yei ktien, wei heijooh i por da ong wa i kyntu toh ya kiwa mihkhmat (MP) wow e yei kyrchaan wa pura hapoh ka Parliament.
