Da u: Chandame Sungoh
Cheiwon ka jaitbru yong i u poi ko? Katni da rap duna ka kjut Corona khai won sa ka thma. Yei yi u beiñ yei yi u kynnoh! Heini te da toh thij kamwa ong da kite kiwa stad klam, “Manda yatylli ki Khasi te u wai ka pyrthai”.
Katni i ya beiñ ya kynnoh, i tympdung bomb, i ya siat pynyap hapyrdi ki pulit ka jylla Meghalaya waka Hynñiewtrep National Liberation Council. Yei yi u beiñ yei yi u kynnoh, wymtoh mo yaka jaitbru yong i? Ki yi kitæ kiwa tympdung bomb ha Khliehriat wa ha Shillong wymtoh mo ki Khasi? Kiyi kitæ ki HNLC? Wym toh mo ki Khasi? Kiyi kitæ ki pulit ? Wym toh mo ki Khasi ? Uyi utæ uwa chah pynyap? Wymtoh mo u Khasi?
Kynmoo O yei wi i rwai maya ri hei ktien Phar kawa ong,
“Da yoo wei da chynna yeiwa jæd yeiwa pra,
Ka sarom ka maraaiñ ka yong phi ka yong nga”.
Da toh thij kamwa ong kini ki kyntien.
Kiwi ki jaitbru wanrah naam wanrah burom ki ya ka ri waka jaitbru. Ka Lovlina Borgohain wanrah naam ko ya ei wa ya ka Assam naka Tokyo Olympic, ka Mirabai Chanu wanrah naam ko ya ka ri waka jaitbru Manipur, ki Mizo da yasiat ki yow yada ya ka ri waka jaitbru. Ki Naga da beh ki yaki Forest Officers waki Pulit Assam haka 14-08-2021 cha East Karbi Anglong yow yada yaka ri, ki pulit Assam da wan sai ki yaki chrot bordiñ ka Meghalaya ha Iongkhuli yow yada yaka ri katwa i won heini ya tympdung bomb i, ya pynyap, pynjæd pynpra kari, yei yi u ya beiñ ya kynnoh i. Kini kiyi kiyi waroh wymtoh mo i wow pynjæd pynpra wei pynjem daw pyn yaka jaitbru yong i?
Weileh wym em lai yada na ki Khar Langpih, ki Karbi cha Block-I Block-II, weileh ki pulit yong i wym li siat ki ya kiwa choon?
Hawa thoh O kamni wym em mut wow pynrem næ klam beiñ yaka jait ka khong, tangwa yei sakhiat hi te hap yaklam hi khnang yow sñiawthooh.
Yaka ri yong i da tip kam ka jylla Christan (ki paralok niam Khasi wymtoh u yamrem ki yeini) hawa man Christan i, ym mut wa man i ki khon wa che kamwa kam i da i ya i hi, wei ka Bible hikai ko ya i wow ya maya kylliang u ya maap kylliang wei u maya leh yaka ri waka jaitbru. Tangwa dei khangtleiñ da joor sa du ki kaam thombor kaam lehbor, kaam pynyap, i tooh i baamsap. Ki paidbah ya pynyap para paidbah, ki heh ki haaiñ pynyap ki para heh pra haaiñ wei kamtæ ter ter.
“U Thlen Khasi bam u du yei snam Khasi,
Ka Taro Pnar baam ko du ya ki Pnar”
Kani da man sakhiat thij kam ka raibi, da yoh ko u kah syrngu ya ka ri waka jaitbru yong i. Para Khasi te yanood sakhiat, ya khlan sakhiat leh, ya stad sakhiat leh, tangwa hakhmat kiwi won pyndem tdong kam u ksaw wa rem yadait. Ki pulit Khasi nood ki u kem u siat du para Khasi, hakhmat u Assamese hakhmat u Nepali hakhmat u Karbi won khian mynsien ki kam u khne hakhmat u miaw. Pait nuksa ha kini ki tayaw wa dep wan hiar thma ki pulit Assam ha Iongkhuli, Ri-Bhoi District wei heiyatoh wa ini, u MDC kani ka thaaiñ da Phone u cha u Deputy Chief Minister wei cha ka DC ka Ri-Bhoi nadooh dang step tangwa wym nood ki u lai, heiwa da lai pyndep rukom won manda tip wa da palat ki pulit Assam. Itæ leh da lai ki du soo san ngut. Ini wymtoh mo i tieñ slah? Pyrkhat da phi para ri.
Disclaimer: The views and opinions expressed in this article are those of the author’s and do not necessarily reflect the official policy or position of this organisation.
