Da u Riquoma Rq. Laloo
Ka parom kyrpang neibhah yong pha,
Wan kyrsu ko, hei mynsien yong nga;
U wandien yong ki wanchwa wa da lai,
U doh u snaam yong ka chnong Jowai.
Klam-siaw ki ha chkoor, miet wa sngi,
Lamtoh katni, mynnu won u leh phi?
To khyrngiat yongbru, to khut ya ki lok,
Pynche ha ki, din pa din, tok pa tok.
Kjut nood u pait, yei doh i pran yong ka,
Wymyoo em kyntang de kamwa nachwa;
I mynsien bru, yoosar katni tam u mrad,
Yaleh dusmon naphang, cha khim cha laad.
Related posts
Ki liar kit taroi waroh cha ka wa kooid,
Ki chka wa em ha ka, kai thawsum mooid;
Sei khloh wei tih, khlem pyrkhat bha,
Yow biang ya nga myntu, ya kiwi yi’u pyrwa.
Bakla ko’u lai, ki luti ki yong ka nachwa,
Dang du wa wan u slap, hali da jæd da pra;
Wamoi waprong bait ko, kat na wa lait luti,
I doohnong kylla, pana wan i pyn cha i.
Aa payu aa para, waroh phi ki lok ki jor,
Wa najan wa najngai, ya waroh khut i por;
Myntu ha nga katni, lym leh i, da’u sep-ai;
Dooh itæ i pyrtuid, Wah wa chong ki Blai.
Aa Wah Myntdu, wah wa em parom,
Na kani ka pateiñ, to im sah yanom;
Dei kyrkhu ki wanchwa, chirup wa’u Blai,
Yoh u khyrngiat won, i ki bru pyrthai.
