Ynne ka sngi mar ya mih ka khubor hajrong i pynlut ka sorkar jylla Manipur heiyatoh wei yakhun ya ka khlam COVID-19, kiwa pynemkaam Social Media hapoh Meghalaya da sdang ki wow wyrchaw yei pynlut kini ki ar jylla heiyatoh weini i yakhun ya kani ka khlam.
Mar ya pynbna u montri rangbah ka jylla Manipur u Biren Singh heiwa da ong u wa ka sorkar yong oo da pynlut ko hadooh T. 60 klur wow yakhun ya kani ka khlam nadooh wa sdang, neiliang kiwa pynemkaam ya ki Social Media hapoh jylla Meghalaya da sdang ki wow wyrchaw yei pynlut iwa da kynjoh hadooh T. 399 klur hajrong ini i jooh da ka sorkar MDA ha Meghalaya.
Ha ki Social Media da yoo ya ki Post wa ha rukom kiwa da wyrchaw yei pynlut hapyrdi kini ki ar tylli ki sorkar jylla deiwa booh ya ki yukheiñ wa ong wa ka Sorkar MDA ha Meghalaya da pynlut ko hadooh T. 399 klur wei da em hadooh palat ynñiaw hajar tam kiwa yoh COVID-19 katwa ka sorkar Manipur won da pynlut ko du T. 60 Klur wei da em khadar hajar tam kiwa yoh ya uni u khñiang.
Chooh chooh da em leh kiwa phah ya ki yukheiñ hajrong i pynlut kini ki ar jylla wei kammon ki kaam wa da leh ki nadooh kiwa da yoh ya u COVID-19, kiwa da chait, kiwa da khlaad wa kiwi kiwi.
Chooh chooh da em leh wot kiwa da dro yei dur u montri rangbah ka jylla, u Conrad Sangma deiwa sap u ya ka ‘Thawb’ ka sula wa sap ki chynrang na ki ri Arab heiwa ha ini i dur da thoh ya i kyntien ‘MEGHALAYA LIVES THE ARABIAN NIGHTS DREAM-THIS IS THE GOVERNMENT OF ALI BABA AND THE FORTY THIEVES”.
Ki dur wa yoh na ki Social Media.
