U Montri Rangbah ka jylla, u Conrad Sangma ynne da klam u da i ktien Khasi wa Garo hapoh ka Yung Dorbar Chna Aiñ hawa e yei jubab hajrong i dawa wow tipmit noh ya ka ktien Khasi wa Garo hapoh ka 8th Schedule ka riti synchaar ka ri India.
Hawa yaklam chaphang kani ka phang, u Conrad da ong wa waroh ki 60 ngut ki MLA toh u e laad ya ki wow klam da ka ktien Khasi wa Garo hapoh ka yung dorbar yow pynyoo cha ka sorkar pyrdi wa ka jylla yieñskem ko ya ini i dawa wow tipmit noh ya kini ki ktien.
Hapyrdi ini i yaklam, u Conrad da klam u da i ktien Khasi deiwa ong, “Sngewbha ai lad ba ki Members ki kren da ka Khasi & Garo hapoh Assembly” wei da pynbood u da i ktien Garo cha u Deputy Speaker, u Timothy D Shira wow e laad u klam da ka ktien Khasi wa Garo hajrong kani ka phang wa da wanrah da u MLA ka Nongpoh, u Mayralborn Syiem.
Neiliang u Mayralborn da ong u wa ka ktien Khasi da thoh ya ka palat 100 snem wei da pynmih chiboon ki kot ki sla, ki phlim, ki rwai wei da em leh boon ki seiñ kiwa da kreh yow pynku ya ka ktien Khasi.
U Conrad da ong u wa da yaklam u wa ki heh ka sorkar pyrdi hajrong ini wei ka sorkar jylla leh da dep ko wow chim yei rai namo ka Resolution yow dawa u tipmit noh ya kini ki ktien wei ini man ko ym du ya ka ktien tangwa yow tipmit leh ya uwi pa uwi na i.
Neiliang u Mayral leh da pynwai u yei klam u deiwa klam da ka ktien ktien Khasi.
