U MLA ka All India Trinamool Congress (AITC) uwa man leh uwa yahkhmat ka Liang Pyrchah ha Meghalaya, u Dr. Mukul Sangma da ong u wa i kynrum kynram heiyatoh wa u pood u ang ka jylla Meghalaya wa Assam toh iwa da neh slem wei iwa kyllaiñ bha.
Da beiñ u leh ya u Montri Rangbah, u Conrad K Sangma wa da leh jhan wow pynbait ya u pood khlem burom ya ki Hima wa ka rukom synchaar tre ri, deiwa ong leh wa ka sorkar Assam kmen ko wa dadep wow soi ya ka soskular sñiawthooh yumut næ ka Memorandum of Understanding (MoU), neibhah u Montri Rangbah ka Meghalaya toh uwa ka-i bait.
U Dr. Mukul Sangma uwa man leh u Montri Rangbah warim ka jylla, ynne ka sngi da lai pait u ya ki thaw khappood ha Ri-Bhoi District wa kynthup ya ka chnong Mawiong, Barapathar wa Maikhuli.
Ini i lai pait u heh ka Liang Pyrchah wan i hadien wa mih kiwa chong chnong kani ka thaaiñ wow pynyoo yei wym hun ya ka soskular wa da soi hapyrdi ka sorkar Assam wa Meghalaya, neibhah i chah pynhaap ya kiwa boon ki thaw yong kiwa chong chnong cha ka jylla Assam.
