Hadien wa ka sorkar jylla da e laad ko ya kiwa 18 snem chaneiñ u chim ki yei tika COVID-19 nadooh ka 14-05-21 neibynta u yada nei poor uni u khñiang, da sakhi ha waroh hi ka Meghalaya da yaknieh kiwa em 18-44 snem wow lai chim ya ini i tika heiwa ha ka 13-05-21 nadooh 12:00 waje pyrdi sngi da wai yow ksoh (Book) yei bhah lai chim tika wei da man ki kiwa da chah Book lut awjan waroh du hapoh kattu katni kynta donhi ha ki 18 tylli ki thaw e tika kiwa da em ha waroh ki District ka jylla heiwa ha West Jaiñtia Hills da em ar tylli ki thaw kitæ ha Jowai Urban PHC, Loomkyrwiang wa ha Dr. Norman Tunnel Hospital.
Napyrdi kiwa wan mih yow chim tika da khana ki yei sñiawkmen yong ki wow yoh ya ini i tika iwa nachwa ym pu em chah yei rta yong ki wow yoh ki wei ym em ki yei artatien wei da pynchlur ki leh ya kiwi wow chim ya ini i tika neibynta u yada yei chait i khiah u paidbah.
Em napyrdi ki paidbah khana ki wa da slem angnood ki u yoh ya kani ka tika tangwa wym pu chah won i rta, kamtæ dap ki dei kmen hadien waka sorkar da pynbna ko wa ki 18 snem chaneiñ leh ye ki u yoh ia kani ka tika.
Em won leh kiwa pynsñiaw wa heiwa sdang em hi ki yei artatien tangwa hadien wa neiliang ka sorkar leh da yaleh ko u pynche u pynsñiawthooh kamtæ da bien won ki u mih chakhmat.
Hapoh ka jylla ynnin ka sngi kawa man ka sngi nyngkong i e tika ya kiwa 18-44 snem, da em 1907 ngut kiwa yoh ya ini i tika.
