Ka Mukhap Handloom & Handicraft Cooperative Society, West Jaiñtia Hills kawi na ka seiñ wa da sdang yei kaam thaiñ that ha u snem 2011 lyngba 25 ngut ki dkhot hapoh i yahkhmat ki arngut ki manbei kiwa man ki Weaving Demonstrator deilang i kyrchaan ka sorkar, katni kani ka seiñ da nang ku nang ku ko hei sap thaiñ lyngba i kreh chitom wot hapyrdi i eh i khoo wei duna.
Ki that wa kani ka Society pynmih ko em ki boonjait wa kynthup ki Ryndia Tlem, ki Muka, ki Shawl, ki kyrchah, that yusem, ki muna wa kiwi.
Kani ka Society najrong wa pynmih that jooh e sikai haroh ko ya kiwi, wei boon hi kiwa chah sikai kiwa katni da ye ki u yieñ hei yong ki i kjat deiwa thaiñ that ha yung namo deiwa embynta haki seiñ SHG wa ki Society.
Hei yaklam waka Kabaitlang Lamare, Secretary Mukhap Handloom & Handicraft Cooperative Society, khana ko wa kani ka khih thaiñ that yarap bha ko ya ki khamtam heipor wa dep rep wei heipor wym yoh khih mylla cha wi. Najrong wa man leh ka khih kawa ye u kreh ha iwon iwon i por wa lait.
Kamwa kani ka Society da nangheh nangkrai ko naki snem chaki snem, katni du hapoh chnong Mukhap da em hadooh kamwa 60 ngut kiwa tip u thaiñ that wei napyrdi kini em kiwa thaiñ ha yung, em won kiwa wan thaiñ hapoh yung ka Society.
Kamwa man katni i eh i khoo kamwa khana ka Kabaitlang Lamare, toh wa dang duna ki kor ki bor kamjooh leh duna ka yaaw ka haat, neibhah jooh pynlai yaaw ki du haki Exhibition wa ki yaaw wa marjan.
Hawa kylli won kammon sñiaw ki hajrong i chah jied wow yoh yei naam State Award, katkam wa pynbna da ka Deputy Director Weaving, ka M.R. Liwait, haka yalang kynmoo burom yaka National Handloom Day wada pynman haka 7 tarik ha Mukhap CFC Cum Production Centre hi, da jubab ko wa katwon dap ki dei sñiaw sarong sñiawkmen neibhah wot hapyrdi i sñiawtlot leh dang chah jied ki.
Wei ong haroh ko wa ini i chah jied yong ki daw nang yoh mynsiem chooh chooh ki u kreh chitom chakhmat.
Ha kani ka yalang kynmoo burom yaka National Handloom Day, wa pynman da ka yung krehkaam u District Handloom Officer, West Jaiñtia Hills District lyngba ka chnat Textile, Directorate of Sericulture and Weaving, ka sorkar jylla, u Nujorki Sungoh, MLA ka thaaiñ uwa man leh u Dy. Chief Whip Meghalaya Legislative Assembly da man u kam u kongsan, u Deputy Commissioner ka West Jaiñtia Hills District, u BS Sohliya kam u symbood kongsan, chirup i emlang u MDC ka thaiñ u W.G.Sungoh, u BDO ka Laskeiñ Block, u B. Ñiang, u R. Tariang, District Handloom Officer West Jaiñtia, u waheh chnong Mukhap wa kiwi najrong ki SHG Society wa wan naki chnong waphær.
U kongsan hawa klam ong u, yow ku chakhmat hap u bood yei stat kiwi won ki ri wa ki jaitbru, tangwa ymtoh won u mylliñ yei tre i thied wa ka dustur riti.
Sñiawkmen haroh u wa lyngba i em ka Society wei chimkhia ka sorkar, u pyrchang thooh ki laad ki luti u pynneh pynsah yei riam tynre wym mut du kat u tipmit hi-eh lyngba ki riam tangwa man i pynchlur haroh yei kaam thaiñ that namo ka Handloom kawa man kam ka laad yohkhih yohkreh.
Discussion about this post