Ha ka 11 tarik uni u bnai da pynman ya ka yalang da ki bor District ka West Jaiñtia Hills ha Conference Room u DC hei pynlai ka J. Kharpuri, ADC kawa man leh kam ka In-Charge ka Amlarem Sub-Division deiwa ya emlang ki BSF, u DSP wa kiwa yahkhmat ka Synjuk ki Waheh Chnong War Jaiñtia deilang wa kiwa yahkhmat ka KSU-WJHDU.
Neiliang ka KSU wa kiwa yahkhmat ka synjuk da pynsñiaw ki yei leh embor wa i thombor ki BSF ya kiwa chong chnong ha ka thaaiñ khappood kiwa da tba kti wot ya ki kynthai wei hajrong ini da dawa wow kyrriah noh chisyndon ya ki BSF kiwa da yang sonteri hapoh ka chnong Amlarem neibhah wa da pynjinjar ki ya ki paidbah wa lai wa wan ha u sarokbah wei toh u lai kynreh lai yang ki cha ki thaw wa em cha khappood.
Neiliang ki BSF da ong ki wa da booh ki ya ka Mobile Check Camp ha Amlarem neidaw wa da yoh hukum ki na ka sorkar pyrdi wei da ye ki booh ya kini katwa kwah ki ha waroh ki thaw wa em ha Meghalaya.
Ka seiñ da ong ko wa i e bor ya ki BSF wow booh ktem kat hawa kwah ki toh iwa pynyoo che wa ka sorkar India kheiñ poh wei yoobeiñ ko ya ki jaitbru yong i, kamtæ da kyrpaad ya ka sorkar jylla wa toh u pynbait lane wow pait deiwi ya ka hukum ka sorkar pyrdi neibynta ki BSF.
Hawa khaddooh, neiliang ki BSF da kohngooh wei da pyndem ki deiwa kular ki wym pyndik de ya ki paidbah wa lai wa wan cha ki thaaiñ khappood wei wow kyrriah noh ki ya ka Mobile Check Camp wa em ha ki thaaiñ Amlarem wa kiwa em hapoh ki chnong ki thaw.
