Iwi i jia wa rap phylla da jia i ha ka chnong Aragittim wa jngai du kamwa 5 Km na Mahendraganj ha South West Garo Hills, heiwa da kop i diñ katwa dang tih ha iwi i thaw neibynta wow pynpoi um cha ka chnong.
Katkam i ong kiwa kreh ka PHE, katwa dang tih ki ya i thlu neibynta ka ka Jal Jeevan Mission (JJM), heipor 3:30 i sngi ka 27 tarik, da kop i diñ syndet syndet ha ini i thaw wa dang tih iwa da pynkhyrngiat ya kiwa kreh.
Katkam wa da yoh yutip da ong wa ini i kop diñ da suba wa ye wow em phñiang Petrol ha ini i thaw.
Ki pulit tymplæh diñ na Mahendraganj da hiar ki wut-wut cha ini i thaw, wei da ong wa ini i thlu wa da tih da mih leh i kynja sboh sabon wa tyrthoo wei ki pulit da kær noh ki ya ini i thaw heiwa da khut leh ya ki bru chemphang wow chemtre yeiwa jia.
