Da thoh da uwi na ki Waheh ka Chnong Jowai uwa ym kwah wow pynmih pyrtuid.
Man iwa yoosarom u pait yei man i long u sarok Old Jowai By-Pass (Intermediary Jowai Bypass ha Riatmulain) uwa pynyabi ya ka Salini Colony nadooh Lad College chadooh Yingkieñ Myntdu uwa da jæd da pai da ki boon snem kattu.
Sñiawsih wow ong wa ki sahep ka ka chnat PWD nadooh u Executive Engineer hadooh u Chief Engineer, ki Montri kani ka sorkar kiwa na kani ka District kamjooh ya u MLA ka Jowai da man ki kiwa yohthiah wei ym chynna ki ya uni u sarok uwa chisien ka sngi da e u i chakri ya ka sor Jowai waroh kawi hei wow pynlait ya ka nei khynnia na i tyrrah kari (Accident) iwa jia man ki por hapoh ka chnong ka thaw.
Jan da boon tylli ki chithi wa thoh kiwa chong chnong kamjooh ka Dorbar Chnong wow pynmiat ya uni u sarok tangwa yoosar waroh kitu ki kot da booh ha kdong yoo kamwa ymtoh de kam u sarok uwa haap hapoh ka Jowai.
Yi myntoi u lai ma lai sorjamin (Survey) ya ki sarok thymme hawa tang ya kiwa da em chwa ymye u pynbiang pyntoh, kopsar ka sorkar, ka PWD heini da ieh ko yeiwa dem wow kdong du yeiwa hær heini?
Hei sakhiat ka kaamram yong ka chnat PWD toh u lai pait langær ya ki sarok wa dadep chna wow pynmiat yeiwa jæd wa pai ym toh u ieh hadooh wym hoi de tang wow lai ki kari.
Nadooh wa da wai ya ka Jowai By Pass wa thymme nadooh Mukhla chadooh Soomer ya uni uwa rim da ieh khonswet khlem em de kiwon kiwon ki sahep na ka chnat wa mano wow li pait li yoo ya oo.
Hajrong wa da sih chwa na i lai ki truck mooyong ryngkat wa i rukom kreh habra kreh tang dep da ki Contractor ha kani ka chnat da pynman chooh chooh ya uni u sarok wapli wow dooh noh u ya i dur i dar wa bha yong oo.
I jrong uni u sarok toh du kamwa 2 Kilometer chiteiñ donhi wei lada chna paka ya oo ym emkaam de wow kyruiñ cha oo ha ki 8-10 snem wei katwon u man ko i kyrkhu ya ki paidbah ka thaaiñ Caroline Colony, Lum Pariat, Tyndo Wapung, C.S. wa ka Salini Colony kamjooh ya ki paaid wa lai wa wan lada ka sorkar wa ka PWD u yaleh ki wow pynmiat ya oo chwa wow poi ly’ur.
Ham ong wa ym emkaam de uni u sarok neibhah dang ha kini ki bnai wa dep da sakhi wa da phah lai ya waroh ki jait kari nadooh ki truck kit mar, ki bus wa ki kari khian kamwa 2 -3 tayaw neidaw wa hap chna pynmiat (Repair) ya u Bypass wa thymme.
Neitæ i daw kyntu wei ban joor ya kani ka sorkar, ki Engineer wa toh u pait ya uni u sarok kamjooh ya u Deputy Commissioner ka West Jaiñtia Hills wow chimkhia ki yei kaam wow pait klaw hei wow siang rong biang ya uni u sarok yow suk ki paidbah u lai u wan khamtam hawa em ka i sahkut kari hapoh chnong Jowai. Ham yang hadooh wow mih wow pynbor ya ki paidbah wow ku yunglieh yungsoo ki du neidaw i chong kli-kti yong phi tangwa pynemkaam yei bor sñiawthooh yong phi wow kreh yow wanrah ko i myntoi ya ki paidbah waroh.
