U President ka Hynniewtrep Youth Council (HYC), u Robertjune Kharjahrin da ong u wa i pynbna ka sorkar wow pyndam noh ya ka aiñ yakhle (Meghalaya Regulation of Gaming Act, 2021) toh dei wym pu pyndam chisiendon ya kani ka aiñ kat wympu wanrah hapoh ka yung dorbar chna aiñ neibhah wow ngait donhi ya i pynbna man iwa eh.
U Montri wa pait ya ka chnat dan (Taxation) ka jylla, u James PK Sangma da pynbna u ynne ka sngi wa ka sorkar daw pyndam noh ko ya kani ka aiñ, wei ini i rai toh hadien wa ka sorkar sñiaw ko wa em i ktah ya ka jylla hadien wa da ap wei yasyllok wa ki heh niam, ki chnong wa ki seiñbhalang.
U Robert da ong u wa i pynbna ktien u James ynne neilang ka seiñ da chim ko wow tip donhi khlem ngait won yeini. Da ong u wa lada ka sorkar mut ko wow pyndam sakhiat ya kani ka aiñ, neiliang ka seiñ e khublei ko ya ka sorkar wa da ap ko ya i dawa ki paidbah wei em leh i tieñ na ka sorkar wa da jan ka Election.
Da ong u wa ka MDA wow pyndam ko ya kani ka aiñ deiwa khooid man ko iwa bakla neibhah boonsien da pynksan bait, yoosar lakam wa tieñ Election tæ da pyndam noh ya kani ka aiñ.
U heh ka HYC da ong u wa katkam ka rukom krehkaam wow pyndam ya kawon kawon ka aiñ da toh u wanrah chwa da ka Repealing Act, lyngba ka Ordinance namo wow pynman ya ka dorbar wa kyrpang wow pyndam da ka aiñ.
Chooh chooh da ong u wa ymye wow len yeiwa sakhiat wa ini i leh kulmar ka sorkar da wanrah i yei doohnong ya ka jylla neibhah wa da pynlut ya i por wa ka poisa ki paidbah heiwa da kylli u leh yi wow su ya ka bai lutsan.
Ha iwi i liang won da ong u wa ka seiñ sñiawkmen ko lada waroh kiwa yahkhmat nadooh ki chnong, ki niam wa ki seiñbhalang wa kiwi kiwi u krehlang ki, ye ki wow pynkylla ya ka jylla wei lada kwah wow wanrah ya ka aiñ wow yada ya ka jaitbru leh ye hi neibhah ini man i bor ki paidbah ha i synchaar paidbah.
