Ka Seiñ Raij Raliang ha kani ka kynti hanlada rai ki wow dam u pynman ya ka syllok ki khon ka Niamtre wa jooh pynman chisien chisnem neidaw u COVID-19 da mih yonglang won ki ynnin ka 14 tarik wow pynkhooid pynjngiar ya ki thaw ka Raij.
Ini i pynkhooid da leh ha ki kamra krehkaam ka Seiñ Raij, ki rana, ki dahari, ki pchem wa kiwi kiwi ki thaw wa kyntang wa em hapoh ka Raij.
Kamtæ ka Seiñ Raij hadien wa dep u pynkhooid ya kini ki thaw daw sdang pynman biang ko ya ki kaam syllok khamtam heiyatoh wa ki kaam niam.
Heijooh i por leh da pyntip wa ya ka yachemlang wa heh ka Seiñ Raij wa jooh pynman ha Chrah-Umphula daw pynman ha u snem wow wan hadien wa yohbor na ka sorkar deiwa bood leh ya ki kyndon yong ka.
