Hadien waka seiñ Jaiñtia Trader Tribal Association (JTTA) da yoo ko wa em ki kari wa li tyrwa thad kylleiñ ki dong ka chnong Jowai ha kini ki kajiak sngi deilang waka tanghæng wow kbai yei dor ki thad wa tyrwa ki. Ynne ka sngi neiliang ka JTTA deilang waka seiñ Meghalaya Indigenous Front da yoh ki wow ksoh ya kawi naki kari hajan ka yung krehkaam ka MeECL Jowai.
Hadien wa yoh ksoh kini ki ar seiñ da tip ki wa em hadooh kamwa 3-4 tylli ki kari wa lai tyrwa thad kamni kiwa chim wai daki baar jylla.
Lyngba ki kot ki sla wada pynyoo u baar jylla wa chim wai kari lai tyrwa thad daka kari Local Taxi, da chem wym em man kiwa biang, kamtæ ki ar seiñ da ong ki wa ini i leh yong oo toh kawa pyrchah aiñ.
Kamtæ hadien chipor wa ksoh ya kani ka kari da wanmih kawi ka kari ki bru samen kawa naka jylla Uttar Pradesh wa em boon ki thad, wei hawa yaklam ki wa utæ u baar jylla, oo won phone kylla u cha uwi u bru wa klam Pnar wei hawa e klam u waki dkhot ka JTTA utæ u bru Pnar da kam u wa oo toh u tre, tangwa manda khut yachem ki ya oo ha yung krehkaam u DC won ym em wan u lait du ki baar jylla wa tyrwa thad donhi.
U Iatha Najiar, President JTTA hadien i yachem yong ki wa u DC da khana u wa neiliang u DC leh wym em e bor u hajrong i kbai tanghæng yong ki, wei kamjooh wym ye ki wow leh kamni khlem yoh bor.
Hajrong ini da kyntu ki ya u DC ka West Jaiñtia Hills kamjooh ka District Council wow leh iyi iyi ya kam kini wa leh pyrchah.
Neiliang u Iatha da ong u wa neipor cheipor kyntu ki yaki dorbar chnong kamjooh ka District Council wow sangeh e Trading License neidaw wa hiar ka kamai kajih tangwa sñiawsih won ki wow yoo la kamwa leh khnang.
Kamtæ da kyrpaad ki yei yakrehlang ki paidabh wym toh u leh Benami khnang yow ye u ku chaphrang.
Neitæ hajrong i sñiaw khubor yong ki wa daw wan ka Vishal ha Jowai yeini leh da kyrpaad ki wow dam e License yei khih yei kreh wa ye u leh da ki bru Pnar.
