Jowai : Uwi na ki bru wa emnaam emburom ka sor Jowai u Pastor Mechak Shylla uwa man leh kam u Principal ka Khasi Jaintia Presbyterian Higher Secondary School, Jowai chirup wa ki 3 ngut ki lok yong oo da chah ksoh (detained) ki ha ki pulit ka Jowai Police Station chi miet wa thmu ki u rahbor ya ar ngut ki khynnah kynthai.
Ini da jia i hei miet ka 24 tarik ha Choice Dhaba kawa em ha Khliehtyechi-Riatturiem ha surok bah heipor kamwa 9:00 waje i miet da em soo ngut ki khynnah kiwa kynthup ya ar ngut ki khynthai wa ar ngut ki chynrang da lai baam ja ki ha ini i dukan. Heipor wa dang baam ja kini ki soo ngut da wan psiah thied sikret u pastor Mechak Shylla na kani ka dukan heiwa da yoo u wa em kini ki soo ngut.
Katwa dang baamja ki uni u pastor da phah u yow tre dukan yow beh noh ki ya kini ki soo ngut wa kynnoh u wa leh kaam dakait ki hapoh ini i dukan.
Hadien wa kyntait u tre dukan wow beh ya ki heipor wa dang baamja ki, uni u pastor da yang u ya kini ki soo ngut ha lait neitæ manda mih ki na kani ka dukan da phah liwan u ya kini ki ar ngut ki chynrang katwa ya kini ki kynthai da phah psiah u ki hapoh ka kari yong oo ka Mahindra XUV wa em ya u Number ML04- C- 1999. Heini i por da synran ya uni u pastor da ki le ngut ki lok yong oo na Khliehtyrshi kiwa da tip kam u Wahanashya Dkhar, U Macket Shylla wa u Damiki Phawa. Heipor wa pynpsiah yabor kini ki bru ya kini ki kynthai da mai sih mai sang ki ya kini ki kynthai wei da maham ki leh wow e kti ya ki (kynthai) cha ki Dalal ka Khliehtyrshi.
Manda mih uni u pastor na kani ka thaw chirup wa ki lok u wa kini ki kynthai wa da kit ki deibor da em kattu katni ki bru kiwa sakhi yeini waroh nadooh wa sdang, dei mynsien wa sniawkhia da kdong ki ya kani ka kari wa tieñsar ki boi jia iwon iwon ya kini ki ar ngut ki khynnah kynthai weiwa da pyntip wot ki wut-wut cha ki bor pulit kiwa em ha yingkieñ Myntdu.
Ki bor pulit mar ya tip yeini da chimkhia ki wow kdong ya kani ka kari u pastor wei da ksoh ya ka najan ka Challam Syngkon Petrol Pump wei da yah ya ki waroh cha thanat.
Ka khubor na ki pulit da ong wa da ksoh ya kini ki soo ngut chimiet hadien wa da ujor (FIR) kini ki ar ngut kini khynnah kynthai. Wei da pyllait noh chipor ya kini ki soo ngut ynnin heipor 3:00 waje i step hadien wa da soi u ya ka PR Bond (Personal Release Bond). Ya ki khynnah kynthai da chah wow liwan ki hadien wa da dep leh ya ka medical check-up wei wa ym em i sma kyiad na ki. Katwa ya ki kynhun u pastor da chem wa u Wahanashya Dkhar sma kiad u. Ya ini i test da leh ki doktor dei wa syu yei ktien yong ki.
Chooh chooh ka yutip wa bniah neiliang u Pastor Meshak Shylla da kyntait u yeini i chah kynnoh yong ki wei da ong u wa ym em u mut sih ki ya kini ki kynthai tangwa da pyrchang u wow yarap ya ki wow liwan ki cha yung.
Kini ki arngut ki khynnah kynthai em ki hapyrdi i rta wa 17-18 snem kawi na Sutnga katwa kawi na Demthring weiwa chong sah ki ha Jowai.
Ynnin ka miet kini ki kynthai da pyndam ki yei ujor (FIR) yong ki heiwa da kam kini ki kynthai wa da ya suk ki pyn arliang.
Heijooh i por ki pulit da pynngat ki ya u Pastor Mechak Shylla ha ka section 365 yong ka IPC (iwa mut wa lada chem dien yei leh bakla u hapoh kani ka kyndon ye u chah kset hadooh 7 snem).
Discussion about this post