Jowai: Ynne ka sngi ka yung krehkaam u Deputy Commissioner, West Jaiñtia Hills deiwa ya krehlang ka Jowai Municipal Board waka Dorbar Chnong Tympang Iawmusiang da pynman ki yei pynkhooid yaki bynta ka Iawmusiang kamwa jooh leh khlieh u snem haka 2 tarik u October, heiwa da sakhi wa yeini i pynkhooid da yachim bynta lang nadooh kiwa chong chnong, kiwa chongdai wow sait ya jar jiar ki dukan dukdoh.
Neitæ da sakhi leh wa kiwa chongdai haki yaw waphær waphær kam haki yaw CNI, yaw Chyiap, yaw Seiñraij leh da ya chimbynta chongchit ki hei pynkhooid. Heijooh i por ki pulit ka Jowai Police Station leh da ya pynkhooid ki yaki soodong sookun yong ka chnat krehkaam yong ki.
Chwa ini da em i yalang wa tbian haphrang ka yung krehkaam u DC wada pynlai da u L. Kynjing, ADC, WJH, ki waheh, kiwa pynlai yaki yaw waphær waphær, u waheh chnong Iawmusiang u E.Shylla wa kiwi.
Ha kani ka yalang da pynsñiawthooh ki yaki paidbah kiwa chong yaw hajrong i kordor yong i khooid i jngiar khamtam ha kam ini i por wa em ka khlam COVID-19.
