Ka 2nd North East Olympic Games 2022 emkaam ko ya i krehlang ki paidbah wa kiwa pynlai chnong ka Ri-loom Khasi-Jaiñtia wei neiliang Ka Synjuk Ki Nongsynshar Shnong Ka Bri U Hynniewtrep (SNSBH) da wan ki chakhmat wow leh yeini yow man ko kawa jop.
Lait na ka yalehbol kawa sdang ynne ka sngi, kani ka tamasa u sdang ko ha ka 10 tarik uni u bnai hadooh ka 16 tarik uni hi u bnai dei wan chimbynta ki hajar ngut na ki 8 jylla ka thaaiñ mihsngi.
Hajrong ini, ka yalang ki waheh chnong da pynman ya ka wa u Montri Rangbah, u Conrad K Sangma, ha ka tayaw wa dadep hei emlang u Additional CEO ka NEOG 2022 wa u Secretary ka sorkar Meghalaya, u Cyril VD Diengdoh wa ka East Khasi Hills Deputy Commissioner, ka Isawanda Laloo.
U Conrad da ong u wa ka Sports man ko ka bynta wa khroo bha ya ka sorkar wei daw pyntikna wa wai luti ya ki khynroo kiwa em sap wei daw pyntikna yeini kamwa da leh da kiwi ki jylla wei ini ym ye i wow man ha ka chi sngi tangwa daw rap chimpor.
Da e nongmuna u ya ka Sports Policy wa ka Youth Policy kiwa daw ye u pynboon ya i yoh takma ksiar ki khynroo ka jylla ha ka National Games heiwa da pynku ya ka song poisa na ka T. 7,000 cha ka T. 2.5 lak katni.
“Ka Manipur da pynman ko ya ka National Games kamwa 20 snem nachwa wei da yoo yeiwa ye ko u khait ya u soh i jop heiwa ka sorkar da pynlut ko yei por waka poisa wow pynku ya ki kaam yalehke hapoh Manipur wei katni da sakhi wa i kaam da man iwa jop wei ini da chimpor 15-20 snem. Wei kamjooh leh chiboon ki kaam wa da sakhi katni ha Meghalaya hajrong ini wei dang em chiboon i wow leh,” da ong u Conrad.
I daw wa kwah ka Meghalaya wow pynman ya ka 2nd North East Olympic Games toh wow lehkmen yei dap 50 snem ka jylla wei wow wailaad ya ki khynnah wow chimbynta ki ha ki kaam yalehke.
Hawa klam wa ki waheh chnong, u Conrad da kyntu u yei yakrehlang yong ka imlang sahlang khnang wa manda liwan yung kiwa chimbynta u man i wow sahkynmoo yanom ki wow em hadooh 4,000 ngut na kylleiñ ka thaaiñ mihsngi.
Neiliang u Diengdoh, da ong u wa khnang wow man ka lympung kawa jop emkaam ya i krehlang yong waroh.
Hajrong ini ka sorkar daw kyrchaan ko ya ki dorbar chnong hei wow pynmiat ya ki, u pynman ya ki tamasa khian, khnang wow pynsñiaw ya ka khubor ka tamasa.
U General Secretary ka SNSBH, u RL Blah da ong u wa ki Rangbah Shnong da kreh bait ki wa ki bor District kamtæ daw pyntikna wa kani ka lympung u man ko kawa jop.
U Blah da ong u wa kani ka juk emlaad bha ko ya ki khynroo ha ki kaam yakehke Sports kamtæ i pynku ya ka song poisa wa yoh kiwa yoh takma daw pynchlur chooh chooh i ya ki wei da kyrmen u wa kani ka lympung daw pynchlur chooh ko ya ki.
