Ku cha 144 tylli ki MBBS Seat deiwa yoh bhah sa ka Shillong Medical College

Ka Shillong Medical College (SMC) u sdang noh ko yei e sikai ha ka tayaaw wa khaddooh uni u bnai hadien wa da mynjur deiwa yoh ya ka chithi Letter of Permission (LOP) na ka National Medical Commission (NMC).

Hawa pynbna yeini ynne ka sngi, neiliang ka Health Minister, ka Dr. M. Ampareen Lyngdoh da ong ko wa uni toh u moomær neibynta ka jylla wei man ko leh ka sngi wa kmen neibynta ka Health Department heiwa ka NMC da e bor ko ya ka Shillong Medical College wow sdang noh ko wow krehkkaam deiwa chim 50 ngut kiwa lai puræ MBBS neibynta u snem puræ 2025-26.

Ka Montri da ong ko wa ini i sdang yei puræ puthi man ko leh katkam wa da booh tarik wow sdang noh hapoh ka ri ya kitu kiwa da pyndep ya ka NEET heiwa ya ka Second Round ka MBBS Counselling u sdang noh ko ha ka 26 tarik uni u bnai.

Da pyntip ko leh wa ka Meghalaya kattu da yoh ko 144 tylli ki MBBS Seat deilang ki 50 tylli ha ka SMC wa 94 tylli lyngba ka State Quota deilang ha NEIGRIHMS wa RIIMS wei da ini daw yarap ko wow jop yei duna Doctor ha ki thaw sumaar ka sorkar.

Heiyatoh wa kiwa sikai ha ka SMC, ka Dr. Ampareen da ong ko wa dadep thung kreh 25 ngut ki Assistant Professor wei dang em ki kreh yong kiwa man kam ki Senior Faculty kiwa dang lait. “Kattæ da yoh 8 ngut na ki 16 ngut ki Professor wa emkaam, 17 ngut na ki 20 ngut ki Associate Professors, 21 na 23 ngut ki Senior Resident wa 12 na 15 ngut ki Tutor kiwa da em kattæ,” da ong ko, deiwa pynrap wa ymtoh iwa suk wow pynhun ya ki Professor wow kreh hapoh ka jylla.

Da ong ko leh yow pyndap ya ki kreh wa dang lait daw hap wow tyrwa da ka tulop wa bien ki u kreh wei da sñiawngooh ko ya u Montri Rangbah yeiwa tuklar u heiwa da ye wow pyndap chwa ya ki kreh wa emkaam kam chibynta wow sdang noh.

Related posts

Lyngba ka CCTV yoo ya uwa wiar na Rymbai wa ku u ya ka Sumo wa lai cha Kalain

September 28, 2025

Ym tieñ u lai chadooh ka aiñ lym yoh u jied waheh chnong deiwa thap Vote, ong uwa daw yaleh waheh chnong ka Khliehmyntriang

September 28, 2025

Ka Montri da pyntipmit ko leh ya ka Dr. Nicola Gracyl Lyngdoh Iangrai, Senior ENT Surgeon na RIIMS kam ka Director wa nyngkong ka Shillong Medical College.

Neiliang ka Dr. Iangrai da pynsñiaw ko yei thrang yong ka wow pynku pynsan ya kani ka thaw puræ yow ye ko u chakri ya ki bru ka Meghalaya.

Ka Montri da pynche ko leh wa ka Tura Medical College man ko ka yong ka hi kawa emkaam u chna ki yung thymme ymtoh kam ka SMC kawa da krehkaam ha ki yung wa da em chwa kiwa da pynchna yow pynkhun ya ki kyndon.

Da pynche ko leh wa ka Meghalaya Quota neibynta ka MBBS kawa da em chwa u neh ko kamjooh ya jylla katkam wa da booh bhah ka sorkar India.