U DC ka East Jaiñtia Hills District da pyntip u wa ynne da pteiñ i thooh ya kiwa chah ktah neiwa jia pdung ha ka krem mooyong wa em ha Mynsngat, Thangskoo heiwa dang em ki bru ka NDRF, SDRF, Special Rescue Team, Police wa ki bor District wei da pynsangeh yei thooh ynne heipor 5:00 waje i janmiet.
Da pyntip leh wa ar ngut kiwa mynsoo, kitæ u Jamil Ahmed Choudhury uwa chah sumaar ha Agile Hospital, Beltola, Guwahati wa u Deb Malakar uwa chah sumaar ha NEIGRIHMS Hospital, Shillong da khlaad noh ki iwa pynku ya kiwa yap cha 32 ngut.
Ki bor District da pynjoor ki yei lai kynreh ya ki thaw tih mooyong pyrchah aiñ deiwa emlang ki Executive Magistrate, ki pulit wa ki bru na ka Directorate of Mineral Resources.
Ha ka 10 tarik da yoh wow kem kamwa 1020 MT u mooyong na u sarok Sohkymphor, kamwa 2091.496 MT na u sarok Sohkymphor wa Byrwai, kamwa 227.78 MT na Sohkymphor, Iurimkhliehshnong wa kamwa 1058 MT na rood sarok ka Byrwai wa Ladmynska.
Ynne ka 11 tarik won da yoh kem kamwa 432.15 MT na chnong Iapmala.
Da booh leh ki FIR heiyatoh wa kini ki kaam tih mooyong pyrchah aiñ wei da lai chakhmat katkam ka aiñ.
Discussion about this post