Ka TUR ha ka kyrwoh wa da phah da ong wa da man ko ka sien wa sah kynmoo dei kthang mynsien wa joor wa i dor Petrol da ku hadooh T. 100 chi liter ha ka jylla Meghalaya.
Da ong wa ki dor yong ki mar ki mata wa kongsan wa kynthup ya ka Petrol nang ku man-i-por katwa ka bai nong wa ka bai mylla næ tulop ki wakreh wa mylla sngi da sah da neh kamjooh da ki phaw snem.
I ku dor i Petrol wa kiwi ki mar mut i wa i im khamtam dooh ha nongbah Shillong da man ko kawa sy’ad wei kiwa boon kiwa chong chnong ym ye ki wow pyndap. Da ong leh wym ye wow len wa kiwa boon kiwa chong chnong ha ka nongbah toh ki bru wa dooh wa duk.
“I ku dor i Petrol da mut leh wa da ku dor ka bai kari, ki marbaam mardih wa kiwi de kiwa emkaam wa kongsan. Ini i ku dor da chah ktah joor ya kiwa chong yaw, kiwa chongdai madan, ki wakreh cha ki yung bru, ki wakreh kynta wa ki wakreh mylla sngi kiwa duna i yoh tulop,” da ong ka TUR.
Da beiñ joor leh ya ka sorkar pyrdi wa da yahkhmat da ka BJP wa ya ka sorkar jylla leh kamjooh wym ye ki u kdoh u khoom yei ku dor ki mar kam i Petrol wei yei wym bna ya kiwa dooh wa duk wa ki wakreh mylla.
Kamtæ ka TUR da dawa ko:
- Wow pynboon ya ki kari kamai paidbah ha man ki chnong wa ki thaaiñ yong ka sor wa khapsor wei wow pynku ya ka dan yong ki kari wa sy’ad dor kam ki SUV.
- Wow pynhiar ya ki dor yong ki marbaam mardih wa kiwi ki mar wa kongsan.
- Wow pynhiar chisyndon ya i dor yong i Petrol.
- Wow pynku noh ya ka bai nong sngi waka bai mylla næ tulop yong ki wakreh mylla sngi.
- Wow pyndooh ka sorkar chi syndon yei yarap poisa ha ki kaam kiwa du kam wow pynluphut khlem da em i mih.
- Wow pyndam noh ya yei rai wow maap ya ka Income Tax wa su da ki Non-Tribal IAS ki wakreh ha ka jylla.
