I dor Petrol wa Diesel da ku i man-ka-sngi la 6 sngi wei ynne ka sngi da ku dur ki da 30 wa 26 paise ha India.
I dor Petrol da pynku da 30 paise chi litre katwai dor Diesel da pynku da 26 paise katkam i pynbna dor da ki Oil Marketing Companies.
Ha Delhi i dor Petrol da ku i cha T. 83.71 chi litre naka T. 83.41 katwa i dor Diesel da ku i cha T. 73.61 naka T. 73.87 chi litre.
Ini i ku dor toh la 6 sngi wei iwa 15 nadooh ka 20 tarik u Khonchonglad (Nov), hadien wa sdang ki Company wa pynmih phñiang wow pynthymme yei dor phñiang hadien wa da sangeh ar bnai chwa.
I dor phñiang wa kattæ toh iwa syad dooh nadooh u Naikhynde (Sep) 2018.
Ha ki 18 sngi i dor Petrol da ku i da T. 2.65 chi litre katwa i Diesel da ku i da T. 3.41.
I ku dor leh da wan i hadien wa ku dor i phñiang ha pyrthai hadien wa kut u Naichiphaw. I phñiang Brent Crude Oil da jan poi i USD 50 chi tadong (Barrel) hadien wa i yooluti wa i dawai yada na u COVID-19 namo i Vaccine daw pynkhai im biang ko yei emkaam yei phñiang.
Chwa u Khonchonglad uni u snem, i dor Petrol da neh i khlem kylla nadooh ka 22 tarik u Naikhynde katwa i dor Diesel ym em kylla i nadooh ka 2 tarik u Naichiphaw.
Ha Mumbai i dor Petrol da poi i T. 90.34 chi litre naka T. 90.05 katwa i Diesel da ku i da cha T. 80.23 naka T. 80.51. Ha Chennai i dor Petrol da poi i T. 86.51, i Diesel T. 79.21, ha Kolkata i dor Petrol da poi i T. 85.13 katwa i Diesel da poi i T. 77.44.
I dor na kiwi ki jylla cha kiwi yaphær i iwa chong jar jiar ka Sales Tax lane ka VAT heiwa ha Jowai i dor Petrol da poi i hadooh T. 88.05 chi liter katwa i Diesel da poi i hadooh T. 80.52.
