Uwa yahkhmat ka liang pyrchah ha ka jylla, u Dr. Mukul Sangma da thær u ya ka sorkar hajrong i ku dor ki mar ki mata, nadooh ki marbaam wa kiwi ki mar wa emkaam ki paidbah. Deiwa ong kiyi wa yoh nong na ini i ku dor, wei ya ini toh wow thooh bniah.
Da ong u wa ka sorkar daw kam ko wa yoh boon i dan na ka GST, deiwa lute na ki paidbah neibhah da ku i dor, ka dan leh yoh lum rap boon deiwa e laad bait wow pynku ya i dor ki mar ki mata ha waroh kawi ka jylla.
Da ong chooh chooh wa ka jylla em ko boon tylli ki karkhana pynmih khyndaw-bilat, tangwa hawa nujor ya i dor ha kani ka jylla i dor yong i khyndaw-bilat sy’ad i boon chah bar ya kiwi ki jylla.
Uwa yahkhmat ka Congress da beiñ u ya ka sorkar wa boonkaam ko wow pyndep ya kiwi ki kaam wa man pyrchah ya ka jylla wei pyndep ya ki rai wa pyrchah ki paidbah, tangwa da pynlut por wow chim ya kam kitæ ki rai jhan ha ki soodong kynroh yong ka Secretariat ha ki 2 bnai wa da dep, deiwa leh embor khlem da ap de ya i sur ki paidbah.
Da ong u wa ka sorkar toh u chimkhia ko yeiwa da klam, deiwa pynrap wa i ku dor yong ki marbaam da man ko cha palatpood, nadooh i phñiang baam wa kiwi kiwi ki marbaam.
U Dr. Mukul da sñiawdiaw u leh wa ki mar kiwa hiar dor toh du ki mar-rep kiwa pynmih na kani ka jylla.
Ha i jooh i por u Dr. Mukul da ong u wa i pyrchang yong kani ka sorkar wow pynbait wa ki tre Petrol Pump kiwa khlem su ya ka dan kattu la le snem deiwa ya pynbait kawa chisien su man ko pyrchah ya ka aiñ, neibhah ki Petrol Pump da dep ki wow chim ya i daan na ki paidbah ha i por wa thap Petrol wei lada ym thap ya ka dan cha ka sorkar, man ko pyrchah ya ka aiñ wei i itæ i ong wow ya pynbait man kawa ym ye wow pdiang neibhah wa ini toh ka poisa wa da lum na ki paidbah.
