I dor i phñiang Petrol wa Diesel ynne ka sngi da poi i cha iwa sy’ad dooh hapoh waroh kawi ka ri hadien wa pynku dor biang da 35 Paise la ar sngi hadien wa neh kat jooh ha ka 12 wa 13 tarik wei ini da man ko leh i sien wa 14 wa ku dor i Petrol wei i sien wa 17 wa da pynku dor ya i Diesel nadooh ka tayaw wa khaddooh u Naikhynde heiwa chwa ini da neh 3 tayaw khlem ku dor.
Ha kiwa boon ki thaw ka ri da tam T. 100 chi liter i Petrol wei da em leh ki jylla wa da tam i Diesel T.100 chi liter wa kynthup ya ka Madhya Pradesh, Rajasthan, Odisha, Andhra Pradesh, Telangana, Gujarat, Maharashtra, Chhattisgarh, Bihar, Kerala, Karnataka wa Leh.
I dor na kawi ka jylla cha kawi yaphær i deiwa kheiñ jar jar ka dan.
I dor wa chalan yei phñiang wym pu dep pynkhooid namo ka Brent Crude Oil ha ki yaw ki haat ka pyrthai da man ko $84.61 chi tadong iwa heh dooh i dor hadien 7 snem iwa da ku leh naka $73.51 ynnin u bnai.
Ka India kawa man ka ri kawa wanrah phñiang na baar ri, i dor leh da ku ryngkat wa i dor wa dai ha ki yaw ki haat ka pyrthai.
I ku dor hapoh ka ri da ku i leh mar ya ka ku dor ha ki yaw ki haat ka pyrthai nadooh ka 28-09-21 neibynta i Petrol wa nadooh ka 24-09-21 neibynta i Diesel.
Nadooh wa sdang ku biang, i Diesel da ku i da T. 5.25 chi liter katwa i Petrol da ku i da T. 4.25 chi litre. Chawa ini, i Petrol da dep ku i da T. 11.44 chi liter nadooh ka 04-05-21 hadooh 17-07-21 katwa i Diesel da ku i da T. 9.14 ha ini i jooh i por.
I dor i Petrol ha Delhi da ku cha T. 105.14 chi liter katwa ha Mumbai won T. 111.09 chi liter. I Diesel won ha Mumbai da poi i T. 101.78 chi liter katwa ha Delhi won T. 93.87 chi liter.
Ha Jowai i Petrol ynne da poi i 100.73 chi liter katwa i Diesel won T. 93.21.
