U Montri wa pait ya ka chnat Excise, u Kyrmen Shylla ynne ka sngi hapoh ka Yung Dorbar Chna Aiñ da khana u ka dan wa da yoh ka chnat da ku bha ko hadien wa da hiar i dai tooh yei kiad ha kini ki soo snem wa da lai.
I yoh dan ka chnat da ku ha kini ki soo snem kitæ u 2018-19 heiwa da yoh T. 226.21 klur, ha u 2019-20 da yoh T. 276.27 klur, ha u 2021-21 da yoh T. 375.38 klur katwa ha u 2021-22 da yoh T. 307.99.
Ha uni u snem hadooh u Naisaphra da yoh T. 137 klur wei da antaad hadooh u 2023 kani daw tam ko T. 300 klur hadooh wow poi T. 350 klur.
Yeini da jubab u Montri hawa kylli u MLA ka liang pyrchah, u Zenith Sangma yei daw wa da ku ki dukan dai kiad da 33% naka 611 tylli ha u 2018 cha ka 812 ha u 2022.
Hadooh u 2022 kiwa boon dooh ki dukan dai kiad toh ha East Khasi Hills 196 tylli, wa ar ka West Garo Hills 164 tylli, wa le ka Ri Bhoi 86 tylli, wa soo ka East Jaiñtia Hills 84 tylli wa san ka South Garo Hills 60 tylli.
Kiwa duna dooh toh ha West Khasi Hills 20 tylli, South West Khasi Hills 21 tylli, North Garo Hills 33 tylli, West Jaiñtia Hills 43 tylli wa ha East Garo Hills 48 tylli.
Ki kaam wa man pyrchah ya ka aiñ wow dai kiad da em ki 1092 tylli ha u snem 2016-17, 1460 tylli ha u snem 2017-18 wa 1014 tylli ha u snem 2018. Ini da hiar cha 807 tylli ha u snem 2019-20, 291 tylli ha u snem 2020-21 wa 233 tylli ha u snem 2021-22 da pyntip u Montri.
Tangwa u Zenith ym hun u ya ini i jubab deiwa ong wa da ku bha ki kaam dai kiad pyrchah ya ka aiñ ha kini ki ar snem ha Tura wa Shillong wei da yoo u yeini hawa lai luti u cha yung wa sah u wa em boon ki kynthai cha rood sarok wa kit muna wow dai kiad ki.
Chooh chooh da ong u wa ha Tura aw jan waroh ki dukan dai kwai leh dai kiad ki pyrchah ya ka aiñ kamtæ da ong u wa ym em hiar ini i kaam tangwa dang ku chooh chooh i.
U Montri da jubab u deiwa ong wa ym toh wa da wiar kiwa dai kiad tooh tangwa da duna ki.
