U montri i chait i khiah ka jylla u AL Hek da pyntip u wa ynne ka sngi waroh kiwa dang yoh COVID-19 da em ki 52 ngut wei da em leh kawi kawa khlaad ynnin i miet ha NEIGRIHMS kawa da kheiñ ynne iwa da poi waroh 53 ngut wa kynthup ya 47 ngut ha East Khasi, 3 ngut ha West Jaiñtia wa 2 ngut ha East Jaiñtia Hills.
Kiwa dang yoh ha East Khasi Hills kiwa em 47 ngut toh ki BSF 9 ngut, kiwi ki chnat chipai 7 ngut wa 31 ngut ki bru paidbah. Na ki 31 ngut ki bru paidbah da em kiwa liwan na baar jylla kam na Pune, Manipur, Arunachal, Assam, Delhi, Rajasthan wa kiwi kiwi. Katwa kiwi toh kiwa yabi na kiwa lai bia cha Greenwood Resort, kiwa yabi wa kiwa liwan na baar, kiwa lai thooh dawai na TB Hospital ha Jhalupara wei uwi toh u Doctor ka Nazareth Hospital.
Kiwa chah sumaar da em ki ha Bethany Hospital, Robert Hospital wa ha NEIGRIHMS.
Ha West Jaiñtia ki 3 ngut kiwa dang yoh toh kawi wakreh ha Blood Bank, Jowai, 1 wa em ha Amlarem wa 1 wa liwan na Assam.
Kiwa dang yoh ha East Jaiñtia Hills kiwa em 2 ngut toh kiwa liwan na Manipur wa na Assam.
Kiwa dang em ya u COVID-19 ha ki District man ki kamni ha wah:
East Khasi Hills-419 ngut kiwa kynthup ya BSF 287 ngut, 111 ngut ki bru paidbah wa 11 ngut na kiwi ki chnat paidbah.
Ri Bhoi-41
East Jaiñtia Hills-4
West Jaiñtia Hills-8
West Garo Hills-15
South West Garo Hills-4
South Garo Hills-2
East Garo Hills-1
North Garo Hills-1
Kiwa dang em ya uni u khñiang da poi ki 495 ngut, kiwa chait 87 ngut wa 5 ngut kiwa yap iwa da poi waroh 587 ngut.
Waroh ki nongmuna wa da phah Test da em ki 32,401 tylli heiwa 31,085 tylli toh kiwa ym em chah ktah wei dang yang yaka Result ki 730 tylli.
Kiwa liwan chapoh ka jylla da em ki waroh 23,706 ngut heiwa nadooh ynne ka sngi hadooh wa kut bnai ym pdiang ya ki.
