Kiwa dang yoh COVID-19 ha India da pteiñ ki wow ku la chi tayaw heiwa ha kini ki 24 kynta da em ki 22,775 ngut iwa boon dooh hadien 85 sngi iwa da pynku leh ya kiwa dang chah ktah wow em biang ki palat 1 lak ngut.
Kiwa dang chait da em ki 8,949 ngut, kiwa yap 406 ngut iwa mut wa kiwa dang chah ktah ha uni u khñiang da ku ki da 13,420 ngut.
Ha kini ki 24 kynta da em du 6 tylli ki jylla wa boon da kiwa chait ya kiwa dang yoh heiwa ki jylla wa boon dooh wa tam da kiwa dang yoh toh ha Maharashtra (6293), West Bengal (1934) wa ha Delhi (1329).
Heiyatoh wa kiwa da yoh ya u Omicron hapoh ka ri, da em ki 1431 ngut iwa ku naka 1,270 ngut ynnin ka sngi katwa kiwa da chait da em ki 488 ngut.
Waroh kiwa dang chah ktah ha u COVID-19 da em ki 1,04,781 ngut, kiwa da chait 3,42,75,312 ngut wa kiwa yap 4,81,486 ngut.
Ynnin ka sngi da leh 11,10,855 tylli ki Test heiwa kiwa chah ktah da em ki 2.05% kawa tip leh kam ka Positivity Rate kawa da ku palat 2% hadien 88 sngi.
Heiyatoh wa i e tika, da dep wow e la 1,45,16,24,150 sien heiwa ynnin ka sngi da e 58,11,487 sien.
