Ynnin ka 12 tarik, ka FKJGP War Jaiñtia Circle da lai yachem ko ya u Assistant Executive Engineer ka MeECL ha yung krehkaam yong oo ha Amlarem. Ini i lai yachem yong ka seiñ ya uni u sahep toh hadien wa ki paaid wa su bai bordiñ da yoo ki yei ku syndet ka bai bordiñ hapoh ka thaaiñ kawa man ar chah na ka T. 231 cha ka T. 463 ha ka chi bnai.
Ini i ku yong ka bai bordiñ da pynlynngoh wei pynchrai ko ya ka seiñ wa ki paidbah yong ka thaaiñ neibhah wa ka chnat MeECL ym pyrkhat ko ya ki paidbah khamtam ha kam ini i por wa em ka khangsbak wei ym ye ki leh wow lai kamai kajih, wei ini da wanrah ko yei eh ya ki paidbah wa chong chnong lada ku syndet ka bai bordiñ.
Ka seiñ da pynsñiaw ko leh yei sñiawkhia wa joor hajrong i leh thurmur wei leh khalær deiwa pynku ya ka bai bordiñ na ka T. 180 chi bnai cha ka T. 7638 hadein ar bnai. Hajrong ini, hadien wa ka seiñ wa da yoh ko wow yaklam wa u sahep ka MeECL uwa toh u pait ya ka Amlarem Sub-Division, da ong u wa daw chimkhia smat u ya ini wei daw leh u ya iwa emkaam.
Chooh chooh ka seiñ da ong ko wa lada ini i kaam ym mih soh i, ka seiñ daw booddien wei ym chong kli kti katwa ym pu ye wow pyndam noh ya ini i eh ki paidbah ka thaaiñ.
