Ka jylla Mizoram kawa em duna dooh kiwa da dep yoh COVID-19 kamjooh kiwa yap na uni u khñiang na ki jylla hapoh ka ri, ha kini ki 24 kynta hadooh i step ka 4 tarik da em 101 ngut kiwa dang yoh wa kynthup ya i khonboo wa dang 2 bnai iwa da pynpoi ya waroh kiwa da dep yoh ya uni u khñiang cha ka 2,893 ngut.
Na kiwa dang yoh thymme, 71 ngut toh kiwa na Aizawl District wa 30 ngut na Champhai District.
59 ngut kiwa dang yoh toh kiwa da Test daka RT-PCR Test ha Zoram Medical College (ZMC), 30 ngut da chem deiwa leh daka TrueNat ha Champhai District Hospital katwa 12 ngut won da chem deiwa leh daka Rapid Antigen Test.
61 ngut kiwa dang yoh thymme toh kiwa lai luti katwa 40 ngut won toh kiwa yachem wa kiwa yoh COVID-19.
I khonboo wa dang ar bnai wa uwi u chipai ka Indian Army toh kiwa dang yoh thymme.
Ini i yoh thymme ki 101 ngut da wan ko heipor wa pynman yaka “No Tolerance Fortnight” hadooh ka 9 tarik uni u bnai wei da booh leh yaka Lockdown ha ki thaw wa em hapoh ka Aizawl Municipal Corporation (AMC) yow khang yei poor uni u khñiang.
Kiwa dang em ya uni u khñiang ha Mizoram da em ki 516 ngut, kiwa da chait da em ki 2,376 ngut wa 1 wa khlaad.
Kiwa da chait da em ki 82.13%, ki Test wa da dep leh da em ki 1,17,038 tylli wa kynthup ya 1,058 tylli ynnin ka sngi.
Na waroh ki 2893 ngut kiwa dang yoh, 2229 ngut toh ki chynrang wa 664 ngut ki kynthai.
