Jowai: Ki bor District ka West Khasi Hills hapoh ka Chief Minister Youth for Green Campaign da pynman ko ya ka Workshop ka wow pyrchang wow pynim biang ya ki ar tylli ki wah wa em ha Nongstoin ka Wah Nonbah waka Wah Nondeiñ kiwa da chah ktah nei heh nei kmai ka chnong ka thaw heiwa da chna yung harood ka wah wei kamjooh leh da pyllait lut ya waroh ki jakhlia cha ki.
Ya kani ka Workshop wa pynman ynne kawa tip kam ka Workshop on the Rejuvenation of River Nonbah and River Nondein heiwa da emlang u Manoj Kumar Misra, uwa jooh man kam u Indian Forest Service Officer wei katni da kreh u wow yada ya ka rymaw heiwa ha New Delhi da yaleh u wow yada u pynim ya ka wah Yammuna wei hapoh ka ri da emkti lang u wow krehlang wa 23 tylli ki kaam pynbha pynmiat ya ka rymaw hapoh ka ri wei da yaleh mukotduma u leh kiwa boon tylli ha ka NGT.
Ha kani ka Workshop da wan leh ki waheh dong ki 16 tylli ki dong, ki sahep sorkar na kiwa boon ki tnat sorkar, ki seiñ ki kynthai, ki seiñbhalang da wan ki wow phyllu yumut chaphang kani ka kaam.
Waroh da pynsñiaw ki yei emkaam wow yada ya ka wah wei da kular ki leh wow leh ya ini wei da klam ki leh yeiwa toor ki paidbah cha rood ka wah deiwa chna yung chna dukan, i pyllai jakhlia hadooh ki paikhana cha kani ka wah wei ym em booh ya u pood hadooh katwon jngai na ka wah ye ki bru chna yung.
Da yaklam leh chaphang i emkaam wow thung dieñ, i pyllang jhep deiwa lai na iwi pa iwi i yung, wow pait yei rukom pynmih jakhlia ki karkhana, u chna ya ki thaw lai uiñke suwari wa kiwi kiwi de.
Da em leh ki waheh dong kiwa ong wa ha ki snem 1970 dang ye u yimpa wei wow khwe na kani ka wah tangwa katni ym ye de.
Da booh por 5 snem wow pynkhooid ya kini ki wah wei u pynemkaam leh da ki stat sayan wa katkam ka juk wa katni.
Discussion about this post