Jowai: Ka seiñ Jaiñtia Students’ Union (JSU) War Jaiñtia Circle hapoh i yahkhmat u Eddy K Photam wa uwa e buit ka seiñ u Treiborlang R Suchen deiwa emlang leh u President ka seiñbei u Lawyerson War da lai yachem ki ya u Chief Executive Officer ka MEeCL u S.N. Umdor ha Jowai ynne ka sngi hajrong i pynslem kani ka chnat sorkar wow pynyoh Transformer cha ki ar chnong kitæ ka Darrang wa Amkoi ki chnong kiwa em hapoh Amlarem Sub Division, West Jaiñtia Hills District.
I yachem ka seiñ wa uni u sahep da man ko kawa mihsoh neidaw wa ka chnat MeECL da pyntip ko wa da dep pynbiang ya u Transformer yow pynpoi chwa cha ka chnong Darrang ha kani ka tayaw wei hadien cha ka chnong Amkoi neidaw wa u Transformer ka chnong Amkoi uwa 63 KvA ym pu em kattæ wei daw pynpoi manda yoh.
Ka seiñ da e khublei kyrpang ko ya ka chnat MeECL wa da chimkhia ko wow pynpoi noh ya u Transformer ha ka chnong Darrang kawa daw yoh noh da u 100 KvA heithaw u 63 KvA uwa da sih noh ha u bnai wa da dep.
Kani toh ka sien wa ar wa ka seiñ da lai yachem ko wow kyrpaad ya ka chnat MeECL wow pynbiang ya ki Transformer kiwa da sih ha kini ki thaaiñ. Kamtæ ka seiñ da e khublei ko leh ya kiwa kitkaam chnong yong ka Darrang wa Amkoi kiwa neiliang yong ki leh na i por cha i por da chimkhia ki wow pynsñiaw cha ki bor wa hajrong yei sih ki Transformer hapoh kini ki chnong, ka seiñ da e khublei ko ya uwa mihkhmat ka thaaiñ u Lahkmen Rymbui uwa man leh u montri wa pait yaka kaam khappood uwa da chimkhia lang wow ap yei eh i khoo ki paidbah ka thaaiñ.
Discussion about this post