Ka Narpuh Border Area Joint Action Committee (NBAJAC) ynne ka sngi da lai e dorkhat ki ha u Montri Rangbah ka Meghalaya, u Conrad Sangma yow dawa chna ya ka yung krehkaam ka C&RD Block ha Lumshnong.
Ha ka dorkhat da ong wa hadien wa ya ka Khliehriat C&RD Block da kyrriah wei da kylla pyrtuid cha ka Wapung C&RD Block, neiliang ki paidbah ka thaaiñ Narpuh wa em cha khappood kiwa man chakdong bha ka jylla Meghalaya wa em pood waka Assam wa Bangladesh da chem chitom ki wow lai wot ha Khliehriat neidaw wa jngai wei katwon chadooh cha Wapung iwa dang jngai chooh chooh.
Da kdaw wa nadooh na Malidor cha Khliehriat da jngai 100 Km wei u sarok leh man u u wym hoi u lai kari khamtam ha ki por wa slap wei kiwa boon ki bru toh ki warep donhi wei du wow lai donhi ha Khliehriat da chongdor T. 600 wei ini da man ko palat yeiwa ye ki u pynmih deiwa mylla chi sngi wei em i por da sepai ka poisa neidaw wym em ki sahep.
Chooh chooh da ong wa i dawa C&RD Block ha Lumshnong toh iwa da sdang nadooh u snem 1996-1997 hapoh i yahkhmat ka All Narpuh Student’s Association.
Da khana leh wa da dep wow e thaw da ka Dorbar Chnong Lumshnong deilang wa i yung khyndaw-bilat wa da dep chna da ka chnong hi yow booh yung krehkaam ka C&RD Block.
Kamtæ neiliang u Conrad da kular u wow pait bha yeini i kaam wei daw e pynbna u manda wanrah ya ka mang tangka ha u bnai wow wan hapoh ka yung dorbar chna aiñ.
