Shillong: U montri rangbah ka jylla, u Conrad Sangma ynne da lai pait u ya ka Nongpoh Civil Hospital chwa wow pynman ya ka yalang wa ki heh ka chnat i chait i khiah hei emlang u montri ka chnat, u AL Hek.
Hawa klam ha ka yalang, u Conrad da ong u wa ka sorkar kheiñkor ko ya i chait i khiah wei daw pyntikna wow e sumaar iwa paka ya ki paidbah.
“Ka sorkar da sdang ko ya ka programme wow e dawai mynkna ya kiwa chah sumaar ha ki Hospital waphær waphær wei wow pynku ya ka bhah poisa (Budget) neibynta kani ka chnat,” da ong u Conrad deiwa kyntu ya ki sahep wa ki Doctor wow e i chakri wa pura ya waroh ki paidbah.
Da ong u leh wa i lai cha ki thaw sumaar iwa da sdang da oo u pteiñ i dei langær wow sñiawthooh yei eh i khoo wa yachem ki paidbah.
Chooh chooh da pyntip u wa ka sorkar daw pynboon ko ya ki wakreh ha kani ka chnat wei wow pynmiat ya ki thaw sumaar wow pynjanai yei rukom e chakri.
Hawa pait ya ka Nongpoh Civil Hospital, u Conrad da pynsñiaw u yei duna ki thaw pynthiah ya kiwa chah sumaar, wei da yaklam u leh wa ki heh hajrong ki luti wa ye u leh wow pait yei sdang boon kiwa wan thooh dawai.
Hajrong ka Megha Health Insurance Scheme (MHIS), u Conrad da phah u ya ka chnat wow pynkrehkaam pura ya kani ka Scheme wow pyntikna wa waroh ki paidbah u yoh myntoi ki na ka.
U Conrad da pyntip u leh wa ka sorkar angnood ko wow sdang ya ka thied ya ki dawai lyngba ka Internet wow pynpliah yei rukom pynpoi ya ki dawai cha ki District, ki PHC, CHC wa ki Sub-Centre. Ya ini i rukom thied dawai u pynkrehkaam noh hapoh chi bnai heiwa daw chna ya ki thaw booh dawai ha waroh ki District.
Da pyntip u leh wa ka Trauma Centre ha Nongpoh Civil Hospital kawa ym em krehkaam la 10 snem u pynkrehkaam noh ya ka hapoh 45 sngi heiwa da bhah ya ka poisa neibynta kiwa kreh wa kiwi kiwi.
Ha kani ka sngi da emlang ki MLA ka Ri-Bhoi District, Deputy Commissioner, wa kiwi kiwi.
Discussion about this post