Hei hiar lai pait lai sylli namo ka Joint Inspection yei kreh pynheh ya u sarok NH-40 (E) uwa na Treiongriang hadooh Lad Muphlang ynne ka sngi, neiliang u Ngaitlang Dhar uwa man u Contractor ka M/s Dhar Construction Company da kular u wa neini chaphrang katwa ye wa lah u yaleh ki u kiar nei pynkai khyndaw cheiliang chariñ wa em ka wah Myntdu.
Heini i lai sylli da emlang leh ki Engineer yong ka chnat PWD naka Jowai Central Division, u ADM ka West Jaiñtia Hills District u L. Kynjing, kiwa chong chnong ka Jowai wa ki dkhot ka seiñ Khooid Ya Ka Wah Myntdu kawa man kawi naka seiñ wa yieñ hajrong ka yurim wow pynyoh yada ya kani ka wah, wei kamjooh neipor cheipor da booh ujor ki cha ki bor sorkar heiyatoh wa i chah ktah ka wah.
U President ka Khooid Ya Ka Wah Myntdu u Khroolamsalanki Pariat hawa klam ha kani ka sngi da ong u wa i pynkai khyndaw cha chariñ yong yong ka wah Myntdu nei kreh pynheh ya uni u sarok wanrah haroh ko yei kylla rong ka wah kawa pyndap umbaam umdih ya ka chnong Jowai najrong wa daw ktah haroh ko yei man i long ka wah ha ki snem wa daw wan.
Heijooh i por da e nongmuna haroh u ya kiwi won ki bynta yong ka wah Myntdu kiwa da chah ktah wei da khian ko lyngba i pynkai khyndaw na i chna sarok ha ki kattu katni snem wa da lai najrong kiwi won ki bynta.
U Ngaitlang Dhar, Contractor yong ka M/s Dhar Construction Company khana u wa ha kini ki sngi wadep da pyntip ki wakreh cha oo wa em kiwa wan ujor, tangwa chim stiñ u neibhah wa hapoh ka jylla boon ware ki seiñbhalang tæ pyrkhat u wa tip iwa toh næ wa lait itæ i wan ujor.
Tangwa hadien wada em i ya pynbait wa ki Executive Engineer yong ka PWD, da wan hiar u ynne ka sngi wei chem u leh yei sakhiat kamjooh man ka bynta wa emkaam tam.
“Heiyatoh wa i pynkreh nadooh kini ki por wadep, ka khyndaw wa mih wei da dep kit leh daki hajar kari, em won ki bynta wym ye u kiar te haap ki, tangwa neini chakhmat katwa ye wa lah u yait i nei pynkai khyndaw,” ong u Ngaitlang.
Ha ki thaw wa emkaam u pynpdung Dynamite won, da ong u wa ki paidbah wym toh u sñiawphær ki neibhah ha kam kini ki khep ym ye u yait lait neidaw wa toh ka bynta wa ye u pynlum pyllang næ kreh dei bor bru.
Da pynrap haroh u deiwa ong, hawa yachong pyrkhat wa ki bru waheh kamjooh hadooh haka sorkar jooh yaklam hi ki heiyatoh wa ka rymaw neibynta u pynneh pynsah, wei ya kam kani kawa da yoo u da ki khmat pathan kawa man ka wah wa pynim yaka chnong Jowai wa kiwa em soodong yong ka, katwa ye u pyrchang ki wow pynbha pynmiat wei pynyirngam neibhah wa hadooh san snem toh ka bynta yong oo wow pynbha pynmiat ya u sarok.
Kiwi won wa pachat yumut heiyatoh wa ka wah Myntdu kynthup ya u EMH Passah kam u bru waheh ka chnong Jowai, neitæ kiwa chong chnong ka Jowai u E. Suting, ka I. Lyngdoh, u J. Phawa kam u warep ka Pynthorneiñ.
