Ka FKJGP West Jaiñtia Hills District wa ki Waheh Chnong ka War Jaiñtia kiwa na khappood wa ka ri Bangladesh hadien wa yoo ki yei kynaad ha kani ka ri, ynnin ka sngi da lai pait ki ya ki khappood nadooh Dawki, Bakur, Riahjalong, Amsapnuh, Nongkhen Amlangpiang, Amdoh, Amsku, Rongkung heiwa da chem ki chiboon i duna nadooh na Riahjalong ter-ter hadooh wa poi ha Rongkung heiwa ym em i kær naar-chieh wei ini da pynsuk i ya ki nong Bangladesh wow psiah tooh chapoh India deiwa suk khamtam lyngba kini ki chnong.
Heiyatoh wa ini, neiliang ka FKJGP wa ki Waheh Chnong ynne da lai yachem ki wa u DC ka West Jaiñtia Hills wow yaklam heiyatoh wa ini i bynta wei ya ki chnong ha khappood da wan mihkhmat da u Waheh Chnong ka Dawki, u Waheh Chnong ka Riahjalong wa u Asst. Waheh Chnong ka Bakur.
Kamtæ neiliang ka FKJGP West Jaiñtia Hills District wa ki Waheh Chnong da kyntu joor ki ya ki bor District wow chimkhia ya ini i kaam deiwa pynbiang ya ki chipai BSF ha chi lynter kini ki thaw wa khappood wa ka ri Bangladesh.
Hadien ini i yachem neiliang u Asst. Waheh Chnong ka Bakur, u A. Khonglah da ong u wa neiliang u DC da pyntip u wa ki chipai kiwa em ha khappood da liwan ki ha kini ki 2-3 sngi wa dadep wei daw chimkhia u wow pynboon ya ki chipai BSF ha khappood.
Discussion about this post