Jowai: Hadien wa kiwa kamai kari da ki kari samen (Private Vehicle) ha EJH Driver da pynsñiaw ki yei chitom wa tyngkhooh ki na ki por cha ki por hakhmat yong ka seiñ neidaw wa chah kem ki ha ki pulit wa i daiñ kuna ya ki ha ki por wa pynman yei sylli ya ki kot kari kiwa kamai da ki kari samen iwa da ktah leh yei kamai ja kpoh yong ki.
Wot hadooh wa neiliang yong ka yungkrehkaam yong u District Transport Officer (DTO) deilang wa ka yungkrehkaam u Deputy Commissioner (DC) East Jaiñtia Hills District da dep pynmih ki ya ka pynbna haka 02-08-2018 kawa da mahahm joor ya kiwa kamai kari da ki kari Private hapoh ka District wei da e por leh hadooh ka 02-11-2018 yaki paidbah wow yaleh ki ya ki Local Taxi Permit waka Tourist Permit katkam wa emkaam ki.
Hajrong kani ka yurim neiliang yong ka East Jaiñtia National Council (EJNC) – Central Executive Council, hapoh i yahkhmat u Nangjan Dkhar, Finance Secretary, ka seiñ ynne ka sngi da lai yachem ko ya u Deputy Commissioner (DC) wa ya u Superintendent of Police (SP) yong ka East Jaiñtia Hills District wei ha ini i yachem wa kini ki khlieh yong ka District ka EJNC da kyntu ko ya ki wow phah sangeh noh ya i kem ya ki kari kamai Private hapoh kini ki 3 bnai wa da e por wow pyndep ya ki kot ki sla yong ki kiwa kwah wow kamai hapoh ka District.
Ha ini i yachem ka seiñ wa ki heh District, da kular wow phah sangeh noh wow kem ya kiwa kamai da ki kari Private hapoh kini ki 3 bnai, chooh chooh neiliang u SP da ong u wa da dep phah khubor cha waroh ki Police Station, Police Outpost hajrong kani ka ka phang wei da kyntu u leh ya ka EJNC wow ya krehlang ki hadien kini ka 3 bnai wei neiliang ka seiñ pynsñiaw ko wa man ko kawa smat wow krehlang hadien kini ki 3 bnai wa da e por.
Also Read: Hukum ki bor District ka EJH ya ki kari samen wow dam noh u kamai khlem Permit
Discussion about this post