Kular u James wow pynchitom ya kiwa emkti wow pynmynsoo ya ka Agnes wa kawa bood ya ka

Shillong: Ynne ka sngi u montri ka chnat kaam pohyung ka jylla, u James Sangma da lai pait u ya ka Agnes Kharshiing wa ka Anita Sangma ha NEIGRIHMS, Shillong heiwa da pynlut por u leh wa ki payu ka Agnes wa kynthup ya u John Kharshiing wa u Francis Kharshiing.

Hadien i yachem neiliang u James da ong u wa ini i jia toh iwa damok khamtam hawa chah dat ki manbei wa ki kynthai deiwa kular wow pynchitom ya waroh kiwa emkti ha ini i kaam.

Hawa kylli won yei rukom tlotbor ki pulit wow takit nadooh i kaam wa yatoh wa u (T) Poipynhun Majaw u heh ka seiñ na ri-loom Jaiñtia uwa da chah tynyap ha u Wisu (March) uni u bnai, neiliang u James da pynche u wa rap chimpor i takit ha kam kini ki kaam.

“Hawa takit ya ini i kaam emkaam wow man kiwa syndong khnang wow lait na i bakla wei wow pynchitom du ya kiwa emkti donhi,” da ong u James.

Related posts

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Phah u Himanta wow tyngkheiñ yei kjat kiwa yaroh ya ka Pakistan

May 2, 2025

U James da pynrap u leh deiwa ong wa ka chnat yong oo booddien ko ya ini i kaam (Majaw) din pa din kamjooh leh ya iwa jia ya ka Agnes deiwa pynrap wa man i iwa bakla lada ong wa i takit man i iwa suki.

Hajrong i dawa ka BJYM wow pynman da ka “Judicial Probe” namo da ka CBI, u James da ong u wa ki pulit ka sorkar jylla man ki kiwa da biang bor wow pyndep ya kini ki takit wei da kem leh ya ki ar ngut wa suba emkti hajrong kini ki kaam wei ym slem de daw pyndep noh yei takit.

Hajrong ka Magisterial Inquiry won u James da ong u wa ka sorkar dang pyrkhat ko hajrong ini deiwa kyntait leh wa em i yalok (nexus) hapyrdi ki pulit wa kiwa khayi mooyong.

Hajrong i chah beiñ wa u James wa u Montri Rangbah ym em wan ki chaphrang wow beiñ yeiwa jia, neiliang yong oo (James) da ong u “Lada ym em klam u montri rangbah hajrong ini iwa jia, ym mut i wa ym em sñiawkhia i ki,”.

Hajrong i wym chong chngaaiñ ki paidbah ka thaaiñ East Jaiñtia Hills, neiliang u James da ong u wa ka sorkar booddien ko yeini wow wanrah yei chngaaiñ mynsien hapyrdi waroh ki paidbah.

Deiwa pynrap leh wa kam kini ki kaam man ki kiwa kitkhia ka sorkar wei waroh kiwa leh pyrchah aiñ u chah pynchitom ki katkam ki kyndon ka aiñ.