Ki wakreh ka GVK hapoh ka Meghalaya EMRI Workers’ Union (MEMRIWU) da dawa ki na ka sorkar wa da toh u pynkut noh ya ka soskular krehkaam wa ka Company GVK, wei lada ka sorkar ym ye ko wow leh, neiliang yong ki dkhot ka MEMRIWU da maham ki wow lai khang tala hi da idæ. Da pyntip leh wa soskular hapyrdi ka ka sorkar jylla wa ka GVK EMRI daw poi noh cha wakut ha ka 31-03-22.
Ynne i janmiet ki dkhot ka MEMRIWU da lai yachem ki ya u Montri Rangbah ka jylla, u Conrad Kongal Sangma wow pynsñiaw yei dawa wa da booh ki hakhmat ka sorkar. Katkam i pyntip yong ki, da ong wa i yachem man ko kawa mihsoh heiwa u Montri Rangbah da kular u wow bichaar ya i dawa wa da booh ki hadien wa da yoh pdiang u ya ka bui (Report) naka chnat i chait i khiah.
Hawa yaklam wa ki laad pathai khubor hadien i yachem wa u Montri Rangbah, u Reachingson Khongwang uwa man kam u Adviser ka MEMRIWU da pyntip u wa ki phang wa ka Union da rah ko wow yaklam markhmat wa u Montri Rangbah man ki leh neibynta wow pynneh ya i kaam wa kreh ki katni wot lada ka sorkar u pyndam ko ya ka soskular wa ka GVK, wei kawi won toh u pyntikna ya i su tulop.
Ha i por step neiliang ki dkhot ka MEMRIWU da yachem ki ya u Montri wa pait ya ka chnat chait i khiah, u James PK Sangma uwa da kular waka sorkar daw pynkut noh chisyndon ya ka soskular krehkaam wa ka GVK manda kut noh ka samoi ha u Wisu (Mar) uni u snem neibhah wa da ktah ya ki paidbah ka jylla.
Neiliang ka President yong ka Union, ka Microlina Syiemlieh da pyntip ko wa u James da kular u leh wa daw chimkhia neibynta wow pynneh ya i kaam wa ki kreh ki neibynta waroh ki wakreh ka 108 wei ym em uwon uwon wow chah pyndam kreh næ chah beh kreh hadien habood.
Hawa yatoh won waka tulop, da pyntip wa u Montri da pyntip u wa ka sorkar da dep ko wow pynbait pynbiang ya i kheiñ i diah wei daw pynlait noh cha ki wakreh ha u bnai wa daw wan.
Hawa kylli hajrong sangeh krehkaam yong ki, ka Syiemlieh da ong ko wa ka Union daw bichaar biang hadien wa da yoh i thoh kawa che na ka sorkar.
