Shillong : Kiwa kitkaam ka seiñ Jaiñtia Students’ Union (JSU) wa kynthup ya ka Shillong Circle ynne ka 24 Naisaphra hapoh i yahkhmat u President ka Seiñ-bei, u Rikut N. Parien kamjooh i emlang u Prof. H. Lamin wa u President wow Vice President ka NEHUSU, da yachem ki ya u Vice Chancellor ka North Eastern Hill University (NEHU) u Prof. S K Srivastava ha Conference Hall ka Academic Block ha pachem kani ka skurbah wow yaklam ya ki kaam waphær waphær hei yatoh wa i puræ puthi.
Ini i yachem da leh hajrong ka nongrim wow pynsñiaw yei wa slem u sdang wow chna ya ka skurbah ha ri-loom Jaiñtia kawa da tip waroh chi kattu kam ka NEHU Jowai Cumpus kawa em ha chnong Wahiajer, West Jaiñtia Hills.
Kam wow pynkynmoo heini wa ya kani ka Campus da mut wow chna ha chnong Moodymmai, heiwa ka chnong da e sñiawbha ko ya ki thaw ka shnong ha u snem 2001-2002 tangwa hadooh u snem 2011-12 ympu ye u chna ya kani ka Campus kamtæ ka chnong da chim biang ko ya kani ka thaw ka chnong wa da e sñiawbha ko. Hadien ini neiliang ka chnong Wahiajer dei mynsien wa khia wa emkaam u em kani ka Campus ha ri-loom Jaiñtia, kamtæ da e sñiawbha noh ko ya i thaw ka chnong wa em harood ka sarok na Wahiajer cha Nartiang kawa heh hadooh kamwa 6.46 hectare.
Ynne ka sngi hei yaklam wei ya phyllu yumut wa u VC ka NEHU, kawa da neh hadooh ar kynta tam, ka seiñ da yohlad wow klam deimiat næ hajrong kani ka phang wei neiliang u VC da pynche u cha kiwa yahkhmat ka seiñ heiwa da kubur u wa da em i mang poisa ka NEHU kawa kynjoh kamwa T. 6 Klur neibynta kani ka Campus wei na kani da pynlut dang du T. 7 lak tam wow seh morcha soodong kani ka thaw.
Neiliang u VC da pynche chooh chooh u wa kani man ko wada mang da ka NEHU wei ymtoh na ka UGC neibhah neiliang ka UGC ym pu em u e ko i tipmit ya kani ka Campus wei ka sorkar da khang ko ya waroh ki skurbah wow chna Campus thymme ki.
U VC da ong u wa katni ka NEHU ym ye de ko u sdang ya kani ka Campus tangwa da kular u ha ki wa yahkhmat ka JSU wow sdang noh ya ki wow sikai pynpliah ya ki khynroo khyllood ha kiwa boonjait yow suk ki u seiñkhih ya kawa ye u khut ya ka kam ka Community College.
Wow sdang ya kini ki laad sikai u VC da kular u wow thung noh da ka Task Force Committee hapoh ar tayaw ya ka wow pynskem næ Notify pyn ha ka tayaw wa nyngkong u Naikhynde uni u snem wei lyngba kani ka Committee daw pyllai chaaid chaaid ki kaam e sikai cha ki khynnah.
Kani man ko katkam ka khubor na u President ka seiñ, u Rikut N. Parien uwa da pynkut deiwa ong wa ka seiñ da sñiawngooh ko ya ka chnong Wahiajer kawa da yoo jngai ya ka mynried ka ri wa ka jaitbru.
Discussion about this post